“Ha'u foin hasoru na'in Prezidente doutór Francisco Guterres ‘Lú Olo’, primeiru enkontru formál depois de rezultadu konfirmadu husi CNE, e ha'u mai aprezenta ha'u-nia komprimentu”, dehan Horta hafoin enkontru ho Prezidente Repúblika, Lú Olo iha Pálasiu Prezidensiál Bairopite, kuarta (27/04).
Iha enkontru dahuluk ne'e, sente kontente tanba sira-nia prezensa dahuluk ida ne'e hetan atendimentu di'ak husi Prezidente Repúblika sesante Lú Olo.
Maibé durante enkontru objetivu prinsipal dahuluk ne'ebé ko’alia mak haree prosesu hand over ka serimónia toma pose ne'ebé sei realiza iha loron 19 inklui selebrasaun loron 20 de maiu.
Ba eventu rua ne'e sei hetan partisipasaun husi konvidadu internasionál sira, tanba ne'e presiza hala'o didi'ak atu garante dignidade Estadu, povu no sosiedade nian.
“Buat hothotu la'o dadaun hela husi ekipa prezidénsia ho estatál, e ho entidade sira selseluk ne'ebé mak partisipa iha prosesu ne'e laiha difikuldade ruma”, afirma nia. (*)