“Balun ita rona katak, dehan iha birokrasia oioin, ne'e mós ita komesa muda sasán sira ne'e”, dehan Ministru Abel Pires ba jornalista sira iha Palásiu Governu, kuarta (27/04).

Iha ezemplu konkretu mak ne'ebé mak uluk Ajensia Dezenvolvimentu Nasionál (ADN) halo verifikasaun sei haruka fila ba Ministériu molok haruka ba (SGP) Sekretáriu Guarda Prinsipál tenke liuhusi Ministériu maibé hahú halo mudansa ba ida ne'e.

“Kuandu uluk ADN halo verifikasaun ona, atu ba pagamentu invezde ADN haruka ba liu SGP atu halo pagamentu la’e, mais tenke liga filafali mai liña Ministériais, entaun iha ne'ebá demora”, hatete nia.

Alende ne'e MOP mós halo kontaktu ho Prezidente Konsellu Administrasaun Fundu Infraestrutura (KAFI), José Reis katak, bainhira ADN halo ona verifikasaun ba obra ruma, haruka diretamente de’it ba nia prosesu kontinua sira.

“Desde fulan-janeiru verifikasaun hotu ona mais filafali ba Ministériu entaun ne'e todan, balun haluha mais, agora ami muda, ha'u hatama ona karta proposta ba Prezidente Konsellu Administrasaun Fundu Infraestrutura (KAFI) para kuandu ADN verifika ona ne'e lalika ona haruka fila, ona ba diretamente tanba ne'e ita sei salva semana to'o fulan ida mak ita tenta atu halo”, informa nia.

Antes ne'e Eis Ministru Obras Públika, Salvador dos Reis hatete, kona-ba estrada iha instituisaun Estadu nafatin hamosu biriokrasia ne'ebé sei nafatin difikuldade iha Ajénsia Governu nian.

“Bee ho eletrisidade ita reforma ona laiha biriokrasia barak, maibé estrada kontinua nafatin funsiona hanesan Ajénsia baibain atu promove sei perkore fundu infraestrutura, ADN verifika lai, KAFI aprova lai, loke tender lai, e depois fó Ministériu Obras Públika", esplika nia.

Maibé dadaun ne'e hahú ona mudansa no garante dezenvolvimentu estrada ne'e la'o lalais maibé nia finalidade ne'e depende ba nia tempu.

Tanba durante ne'e prosesu Biriokrasia iha KAFI halo impedimentu boot maibé agora hahú mudansa ba prosesu hirak ne'e tanba ne'e mak sei halo mudansa ba impedimentu konstrusaun estrada sira ne'ebé mak durante ne'e iha.

Ba KAFI ne’ebé hari’i iha tinan 2011 no sai nu’udar instrumentu finanseiru nia objetivu mak atu fó apoiu ba projetu estratéjiku sira hodi reforsa kresimentu ekonómiku Timor-Leste nian, ho fasilita dezenvolvimentu infraestrutura sira no prepara fonte finanseira ba projetu sira kona-ba estrada no ponte, aeroportu no portu marítimu, fornesimentu bee-moos no enerjia, edukasaun no saúde, turizmu no projetu boot sira seluk ne’ebé utiliza orsamentu boot liu dolar amerikanu millaun ida.

Tanba Fundu Infraestrutura ninia sustentabilidade liga diretamente ho prioridade estratéjiku sira kona-ba dezenvolvimentu ekonómiku, impaktu sosiál no ambientál, ne’ebé aliña ho objetivu sira husi dezenvolvimentu sustentavel no Planu Estratéjiku Dezenvolvimentu 2011-2030 nian.

Hafoin kriasaun Fundu Infraestrutura nian, Governu hari’i Konsellu Administrasaun Fundu Infraestrutura (KAFI) nian nu’udar órgaun ezekutivu ne’ebé iha podér hodi foti desizaun kona-ba matéria hothotu ne’ebé iha relasaun ho projetu sira husi Fundu Infraestrutura nian.

Nune’e KAFI fó mós orientasaun polítika ba instituisaun ka liña ministeriál setoriál sira ne’ebé ezekuta fundu ne’e.

Sekretariadu Projetu Boot sira-nian mak sai nu’udar responsável ba apoiu tékniku no administrativu ba KAFI, liuhusi koordenasaun direta ho ADN, KNA (Komisaun Nasionál Aprivizionamentu) no liña ministeriál sira.

Iha ne’e, Sekretariadu ne’e mós asume responsabilidade atu halo avaliasaun no estudu kona-ba viabilidade projetu sira nian, fó rekomendasaun sira kona-ba disponibilidade orsamentu nian, nomós opsaun sira finansiamentu nian no ezekuta pagamentu sira tuir rekomendasaun sira husi ADN. (*)