“Ha'u hanoin ne'e demokrasia ne'e hanesan ne'e, lakon ka manán tanto faz, povu mak sai juiz, ohin loron ne'e duni mak povu julga. Ha'u garante ona katak manán maibé ita haree hamutuk iha nia rezultadu mak sei determina”, dehan Lú Olo hafoin ezerse nia direitu vota iha sentru votasaun Faról, tersa (19/04).

Bainhira re-eleitu hanesan Prezidente Repúblika, Lú Olo sai prezidente Repúblika ba povu tomak, no kumpri kompromissu tomak hodi bele koopera ho orgaun soberania sira seluk atu garante paz no estabelidade no halo dezenvolvimentu iha rai laran.

Nune'e husu ba sidadaun sira hotu, atu hakat ba sentru votasaun, hodi ezerse nia direitu hodi hili kandidatus ida hodi sai prezidente ba nasaun Timor-Leste.

“Rezultadu husi ha'u-nia vota mak ha'u foin hatete, mak sai paz no estabilidade ba nia povu rasik iha Timor laran tomak”, deklara nia.

Maibé manán ka lakon, tenke firme nafatin ho dignidade, hodi kontribui nafatin ba estabilidade iha rai laran.

“Demokrasia ne'e hanesan ne'e duni, lakon ka manán ha'u sempre hatete nafatin ho dignidade, maibé karik la eleitu hanesan sidadaun ha'u sempre kontribui nafatin, saida mak ha'u bele para ita-nia rai ne'e bele ba oin, liuhusi ha'u-nia kompromissu hothotu ne'ebé mak ha'u hatete ona”, afirma nia. (*)