"Iha ne'e reprezenta partidu lubuk ida, la'ós CNRT de'it, iha ne'e iha PLP rasik, KHUNTO, FRETILIN. En-nome Organizasaun Rejisténsia Fuan Domin no hanesan membru organziasaun PSHT, hakarak deklara ba públiku katak, ami rejeita totál ba esteitmentu ne'ebé sai husi Sr. Pedro Aparício hodi lori naran PSHT, e dekara nia-an nu’udar Sekretáriu Jerál, hasai liafuan kroat no insultu ba figura rejisténsia Komandante en-Xefe das Falintil Kay Rala Xanana Gusmão”, afirma Portavóz Organizasaun Rejisténsia Fuan Domin, Sergio Elidio Borja de Deus iha Palapasu, Suku Moatel, sábadu (16/04).

Tanba iha deklarasaun ne’ebé Sekretáriu Jerál PSHT, Pedro Aparicio fó sai ba públiku katak asaun karidade ba povu ne’ebé hala'o husi Xanana Gusmão durante ne'e sai hanesan sandiwara, ne'e laloos.

Ba deklarasaun ida ne'e mak membru PSHT konsidera nia kontra ona estatutu organizasaun PSHT nian, ne’ebé ko'alia momoos katak bandu membru hotu atu lori organizasaun ba vida polítika ne’ebé hakerek mós iha estatutu orgániku tinan 2009, artigu 5, kona-ba natureza PSHT Timor-Leste nian.

"Maibé mós iha estatutu PSHT nian, la taka dalan ba membru PSHT ida-idak, atu envolve-an hanesan sidadaun hodi halo polítika konforme nia eskolla ho konsiénsia rasik, sein obrigasaun husi ema seluk ou estrutura PSHT rasik”, esplika nia.

Tanba ne'e, membru PSHT ne’ebé hamahon-an iha Organizasaun Rejisténsia Fuan Domin hakarak informa ba públiku katak, maske durante ne'e organizasaun refere seidauk iha konsolidasaun estrutura maibé agora dadauk sira hahú tama ona ba faze konsolidasaun no sei toma konsiderasaun ba pontu sira ne’ebé iha atubele fó mensajen ba estrutura sira liuhusi kongressu.

"Sim klaru ke ohin ami ko'alia ona katak PSHT nia ema iha partidu hotu ne’ebé mak agora iha Timór iha hotu kedas, ne’ebé sira ba ne'e reprezenta individu sira-nian, organizasaun seidauk hasai orientasaun no mensajen ruma ba sira atu lori atributu ou lori kualker organizasaun PSHT nia naran ba vida polítika”, afirma nia. (*)