Ministru Asuntu Parlamentar no Komunikasaun Sosiál Interinu, Merício Juvinal dos Reis ‘Akara’ hatene, durante eleisaun prezidensiál primeira ronde servisu jornalista la akontese insidente grave ruma nune'e Governu apresia ba servisu jornalista nia.

“Durante primeira ronde mídia servísu di'ak loos profesionál loos laiha insidente grave ruma, laiha ema ida mak mai protesta kona-ba mídia nia sala ka, la halo notísia ka durante ne'e ladún iha entaun ho briefing ohin ne'e ita atu fó apresiasaun ba serbisu mídia durante kampaña primeiru ronde nian”, dehan Mericio Akara ba jornalista sira iha salaun PCM Palásiu Governu, sesta (01/04).

Durante ne'e jornalista konsege kontribui ba paz no estabilidade no hala'o mós edukasaun sivika ba komunidade sira atu nune'e sira vota tuir konsiénsia.

“Atividade ohin hanesan briefing ida ho mídia tanba antes eleisaun primeira ronde ita mós halo briefing ida oinsá para mídia kontribui ba paz no estabilidade citizen journalism ne'e oinsá mídia bele ajuda prosesu halo edukasaun sivika para sidadaun sira vota konsiénsia oinsá mídia bele tulun Governu atu fó informasaun loos no kredível”, afirma nia.

Tanba iha kampaña eleisaun primeira ronde ne'ebé la'o di'ak nune'e Governu kontinua husu ba jornalista sira liliu na'in ba mídia sira atu nafatin mantein serbisu sira ne'ebé mak hala'o ona iha eleisaun primeira ronde.

“Agora ida ne'e ita hotu hatene ba segundu ronde tanba ne'e ita mós aproveita, fó hanoin ba malu fali, para mantein kode etika jornalista nian, servisu tuir líder etika, profesionál imparsiál, fó informasaun loos no kredível kontribui ba situasaun hakmatek, liuhusi output ne'ebé mak notísia edukativu, kontribui nafatin ba peace journalism ne'e”, haktenik nia. (*)