“Foin ita asiste liu serimónia tomada pose ba Membru Governu na'in-2 ne'ebé sei ba okupa fatin muito importante tebtebes, nune'e atubele hodi hetan solusaun ba problema sira hotu ne'ebé mak afeta ba ita-nia povu nia moris”, deklara PR Lú Olo hafoin fó tomada pose ba membru governu na'in-rua ne’e iha Palásiu Prezidensiál, Bairopite, kinta (31/03).
Tanba liuhusi dekretu Prezidente Repúblika númeru 20/2022, iha loron kuarta (30/3), nomeia membru Governu na’in-2 tuir konstitusionál artigu 106 númeru 2.
Membru Governu na’in-rua ne'ebé sei simu pose hanesan Sekretáriu Estadu ba Terras no Propriedade (SETP), Eldino Rodrigues dos Santos no Sekretária Estadu ba Igualdade no Inkluzaun (SEII), Maria do Rosario Fátima Correia.
Iha Dekretu Prezidente Repúblika númeru 19/2022, Prezidente Repúblika deside ezonera, Sekretáriu Estadu ba Terras no Propriedade, Mario Ximenes no Sekretária Estadu ba Igualdade no Inkluzaun, Maria José da Fonseca Monteiro de Jesus, tuir proposta ne'ebe Primeiru Ministru aprezenta.
Ba kargu rua ne'e, Prezidente Repúblika haree importante hotu ba povu ida ne'e liliu kona-ba propriedade ninian.
Tanba lei ba propriedade Prezidente Repúblika rasik promulga ona, no agora ne'e haree de'it oinsá mak atu forma ninia implementasaun atubele garante diretu liberdade fundamental sidadaun sira-nian ligadu ba sira nia bens no movel sira hotu.
"Ha'u haree katak aspetu ida ne'e mak importante hanesan ohin ha'u-nia diskursu ha'u hatete e importante mós ba señora Sekretáriu Estadu Igualidade no Inkluzaun, ne'ebé funsaun ida importante mós”, hatete nia.
Antes ne’e, rezidente Repúblika (PR), Francisco Guterres ‘Lú Olo', liuhusi Dekretu Prezidente Repúblika nomea membru Governu Konstitusionál daualu na’in-haat (4) foun ne’ebé sei simu pose, tersa (22/03), iha Palasiu Prezidensial, Bairopite.
“Prezidente Repúblika uza nia kompeténsia konstitusionál tuir artigu 106 númeru 2 halo nomeasaun ba membru Governu bazeia ba proposta husi Primeiru Ministru. Tuir artigu 86 alinea h) Konstituisaun Repúblika Demokrátika Timor-Leste hatete katak Prezidente Repúblika mak iha kompeténsia atu nomea, fó posse no ezonera membru Governu, tuir proposta husi Primeiru Ministru”, dehan liuhusi Komunikadu Imprensa ne'ebé www.tempotimor.co asesu iha segunda (21/03).
Membru Governu na’in-4 ne’ebé hetan nomeasaun husi Prezidente Repúblika mak hanesan Ministru Obras Públika, Abel Pires da Silva, Ministru Justisa, Tiago Amaral Sarmento, Vise-Ministru Finansas, António Freitas, Sekretáriu Estadu ba Assuntus Kombatentes Libertasaun Nasionál, Júlio da Conceição ‘Loro Messak’.
Prezidente Repúblika, Franciso Guterres Lú Olo, sei fó posse ba membru Governu na’in-4 iha loron tersa, 22 marsu 2022, tuku 09.30, iha Palásiu Prezidensiál Nicolau Lobato.
Molok halo nomeasaun ba membru Governu na’in-haat, tuir proposta husi Primeiru Ministru, Prezidente Repúblika liuhusi Dekretu Prezidente Repúblika ezonera Ministru Obras Púbilkas, Salvador Eugénio Soares dos Reis Pires, Ministru Justisa, Manuel Cárceres da Costa, Vise-Ministra Finansas, Sara Lobo Brites, Sekretáriu Estadu ba Assuntus Kombatentes Libertasaun Nasionál, Gil da Costa Monteiro ‘Oan Soru’. (*)