"Husi ami kelikai nia hanoin, Minisitéiru kompetente bele kordena ho Minisitéiru Estatál aranja transporte ba estudante iha Dili lori ba nia moris fatin atu vota, tanba difikulta ba transporte ne'ebé la mai vota," dehan Mateus ba www.tempotimor.com via telefone, domingu (27/03).

Tanba, iha eleisaun primeira ronde, Governu liuhusi Komisaun Nasionál Eleisaun (CNE-sigla portugés) ho Sekretáriadu Tékniku Administrasaun Eleitórál (STAE) lansa ona sentru votasaun paralelu iha Dili, maibé eleitóres balun la konsege rejistu, enkuantu eleitóres balun konsege rejistu, maibé to'o tempu tuir votasaun naran laiha lista.

"Ne'ebé balun atu mai vota iha nia moris fatin mai to'o suku, la tuir votasaun, tanba iha ona deklarasaun estasaun paralelu," nia hatete

Dadus provizóriu husi Postu Kelikai sidadaun ne'ebé la tuir iha eleisaun husi Suku Afaça 277, Baguia 15, Laisorulai de Baixo 458, Maluru 311, Namanei 268, Makalaku 3, enkuantu suku seluk seidauk iha dadus lolos.

Xefe Suku Uaigae, Marcos Pereira Soares hatete, eleitóres sira balun husi suku uaigae, antes ne'e rejistu ona naran iha sentru votasaun paralelu Dili, maibé to'o tempu tuir votasaun naran laiha lista.

Nune'e, eleitóres sira deside, dezloka husi Dili mai Munísipiu, atu tuir votasaun iha nia Suku, maibé to'o iha sentru votasaun ne'ebé estabelese iha kada Suku taka, tanba to'o tarde.

"Na'in-4 mak la vota, to'o iha sentru paralelu naran laiha, tanba sá mak hanesan ne'e," nia hakotu. (*)