Sekretáriu Estadu Terras no Prioridade (SETP) sesante, Mário Ximenes hatete, tempu badak sei husik kna’ar nu'udar membru Governu daualu, tanba simu ona informasuan husi Xefe Governu.

“Ha'u sente assuntu ne'e ita-boot sira hatene hotu ona, señor Primeiru Ministru bolu ha'u mai atu klarifika tempu badak ha'u tenke sai, husik ha'u-nia pozisaun hanesan membru Governu”, dehan SETP Mário Ximenes ba jornalista sira iha Rezidénsia Ofisiál Faról, segunda (28/03).

Mário Ximenes husi partidu KHUNTO nia assume kna’ar hanesan membru Governu nu'udar Sekretáriu Estadu Terras Propriedades (SETP) durante tinan tolu fulan sia nia laran, no ikus mai hetan ezonera husi PM Taur Matan Ruak.

“Ha'u durante assume kargu ha'u fó ha'u-nia prestasaun servisu ha'u bele halo tuir saida mak ha'u bele kontribui ba nasaun ida ne'e ha'u fó, ha'u fó liu ha'u-nia kbi’it, ha'u sente labele karik mais tuir ha'u-nia kbii’t mak ha'u kontribui ona tinan 3 fulan sia”, deklara nia.

Maske hetan ona ezonerasaun husi PM Taur, maibé nia parte seidauk hatene ema ne’ebé atu asume kna’ar Sekretáriu Estadu hodi kontinua servisu ba tinan ida ho balun nia laran.

“Hotu hotu hatene ha'u mai husi partidu KHUNTO, se mak mai ha'u la hatene, ita prontu simu ema ita mós prontu husik ida ne'e mak ha'u kaer iha ha'u nia fuan, Kona-ba tanba saida ne'e ha'u la hatene, maibé buat ida pozisaun ne'e emprestadu, kuandu iha fiar iha simu kuandu laiha fiar iha tenke husik prontu atu simu laiha tan kestaun”, haktuir nia.

Servisu susesu ne'ebé mak Sekretáriu Estadu ne'e husik hela mak durante tempu pandemia SETP konsege kobre rendimentu husi millaun $2.8 sa'e ba $4.3.

“Servisu la'o normál hanesan baibain ha'u-nia susesu ida mak iha setimu Governu rendimentu iha Terras Propriedades ne'e millaun 2.8 de'it maibé iha ha'u-nia mandatu ida tempu situasaun Covid-19 estabilidade polítika laiha konsege atinje husi millan 2.8 sa'e millaun 4.3 ida ne'e mak ha'u susesu ida seluk ha'u la hatene”, deklara nia

Hafoin enkontru simu husik kna’ar SETP Xefe Governu, Taur Matan Ruak kontinua fó korajen no tenke simu realidade, hodi kontinua servi nasaun husi dalan seluk ne’ebé nia parte iha.

“Mensajen husi Primeiru Ministru fó korajen ba ha'u tenke ser simu ida”, konta tuir.

Antes ne’e, Primeiru Ministru (PM), Taur Matan Ruak, ko’alia ona katak, sei halo remodelasaun membru Governu balun iha Governu daualu nia laran.

“Sei iha maibé to'o tempu ita sira sei hatene, ami sei fó hatene ba ita-boot sira”, dehan PM Taur hafoin hasoru malu ho PR Lú Olo iha Palasíu Prezidensiál Bairupite, kinta (24/03).

Tanba ne’e, dekretu ne’ebé fó sai iha loron segunda (21/03), Prezidente Repúblika (PR), Francisco Guterres ‘Lú Olo', liuhusi Dekretu Prezidente Repúblika nomea membru Governu Konstitusionál daualu na’in-4 foun ne’ebé simu pose iha loron tersa (22/03).

“Prezidente Repúblika uza nia kompeténsia konstitusionál tuir artigu 106 númeru 2 halo nomeasaun ba membru Governu bazeia ba proposta husi Primeiru Ministru. Tuir artigu 86 alinea h) Konstituisaun Repúblika Demokrátika Timor-Leste hatete katak Prezidente Repúblika mak iha kompeténsia atu nomea, fó posse no ezonera membru Governu, tuir proposta husi Primeiru Ministru”, dehan liuhusi Komunikadu Imprensa ne'ebé www.tempotimor.co  asesu iha segunda (21/03).

Membru Governu na’in-4 ne’ebé hetan nomeasaun husi Prezidente Repúblika mak hanesan Ministru Obras Públika, Abel Pires da Silva, Ministru Justisa, Tiago Amaral Sarmento, Vise-Ministru Finansas, António Freitas, Sekretáriu Estadu ba Assuntus Kombatentes Libertasaun Nasionál, Júlio da Conceição ‘Loro Messak’.

Molok halo nomeasaun ba membru Governu na’in-haat, tuir proposta husi Primeiru Ministru, Prezidente Repúblika liuhusi Dekretu Prezidente Repúblika ezonera Ministru Obras Púbilkas, Salvador Eugénio Soares dos Reis Pires, Ministru Justisa, Manuel Cárceres da Costa, Vise-Ministra Finansas, Sara Lobo Brites, Sekretáriu Estadu ba Assuntus Kombatentes Libertasaun Nasionál, Gil da Costa Monteiro ‘Oan Soru’. (*)