Tempotimor (Dili)-Bankada Frente Revolusionáriu Timor-Leste no Independente (FRETILIN) no Partidu Libertasaun Populár (PLP) inklui Kmanek Haburas Unidade Nasionál Timor Oan (KHUNTO) sei hadau malu ba kargu Prezidente Komisaun E trata asuntu Infraestrutura, Transporte no Komunikasun iha Parlamentu Nasionál (PN).

Tanba Prezidente sesante Abel Pires ne'ebé mak durante ne'e sai kompozisaun ba meza komisaun E, dadauk asume ona kargu Ministru Obras Públika (MOP) iha Governu daualu, nunne'e iha deliberasaun ida atubele hili fali deputadu ida sai Prezidente ba Komisaun E.

Vise Prezidente Komisaun E, Fabião de Oliveira hatete, kona-ba halo substituisaun ba eis-Prezidente Komisaun E, Abel Pires ne'e depende ba deliberasaun no eleisaun iha semana oin, bele FRETILIN mak lidera ou se la'e KHUNTO no PLP mak lidera.

“Depende ba eleisaun deliberasaun iha membru Komisaun E, bele maihusi FRETILIN nian, bele mai husi PLP nian. Sira ne'ebé agora ukun dadauk ne'e, iha Bankada de Plataforma de Intendimentu ba Governu ida ne'e”, hatete nia iha Parlamentu Nasionál, kuarta (23/03).

Tanba atu substitui ne'e, labele dehan Prezidente Abel Pires da Silva ba asume tiha kargu foun automatikamente vise-Prezidente mak atu sa'e ne'e laloos, tanba prosesu hotu sei hala'o tuir baze legal ne'ebé previstu ona iha rejimentu Parlamentu nian.

Nunne'e, iha semana oin Komisaun E sei tau ajenda ida ne'e atu halo eleisaun ka deliberasaun ida atu hili filafali kompozisaun ba meza komisaun E asuntu infraestrutura, transporte e komunikasaun.

"Lista ne'e iha tiha ona, imi horisehik haree substitui tiha ona Doutor Abel husi Bankada PLP nian, e depois aprezenta lista ne'e husi membru komisaun E, sé aprezenta lista dehan katal naran ida ne'e ami propoin se karik bele sai Prezidente ba Komisaun E, depois mak halo deliberasaun ba eleisaun para hetan legalodade husi membru komisaun”, informa nia. (*)