“Depois STAE halo hotu kontajen iha nível munisípiu haruka kedas mai CNE mak ohin (22/03) ita abertura apuramentu nasionál partisipa husi entidade hotu. Prosesu apuramentu nasionál ne’e sei hala’o durante loron tolu (oras 72) depois elabora ninia rezultadu mak lori ba tribunál rekursu. Ita sei halo verifikasaun ba votu reklamadu, nulu atu hasai pontu ida katak ida ne’e merese ba kandidatu ida ka nulu nafatin”, dehan Prezidente CNE, José Agostinho Belo, iha salaun CNE, Kolmera, tersa (22/03).
Tanba ne’e, CNE sei halo verifikasaun karik votu sei aumenta mak porsentu sa’e ka tun tanba sei iha prosesu nia laran ema hotu seidauk hatene atu ba segundu volta. Maibé hakarak atu primeiru volta ka segundu volta depende ba prosesu tomak transparente no ema hotu bele simu, labele adianta.
Iha prosesu apuramentu nasionál ne’e, liuhusi plenáriu komisáriu CNE hasai mós regra ba partisipante observadór nasionál, internasionál, fiskál no mídia, bainhiera tama ba resintu CNE tenke uza kartaun kredénsial.
“Regra sira ne’ebé mak CNE aprova liuhusi plenáriu mak, labele halo movimentu iha fatin apuramentu, tenke uza máskara, tama resintu CNE tenke uza kartaun kredensiál, labele entrevista iha sala apuramentu nia laran”, dhan nia.
Apuramentu nasionál ne’e hahú husi munisípiu ho alfatetu, enkuantu ba akta iha estranjeiru sei to’o Timor-Leste, iha loron 25 Marsu husi Austrália nian, no 27 Marsu nasaun sira seluk mós bele to’o ona Timor-Leste. (*).
