Prezidente CNJTL, Maria Dadi Magno hatete, elisaun prezidensiál hatudu rezultadu servisu husi orgaun eleitorál husi CNE ho STAE failla iha edukasaun sivika ba sidadaun sira, tanba votu nulu barak.

“Eleisaun prezidensiál hatudu rezultadu servisu husi orgaun eleitorál husi CNE ho STAE failla iha edukasaun sivika ba sidadaun sira, tanba votu nulu barak. Sim ida ne’e ita bele dehan, failla boot husi ita-nia orgaun eleitorál, tanba sira menus halo sosializasaun kona-ba edukasaun sivika ba sidadaun sira ikus mai akontese rezultadu kontajen hatudu votu nulu barak”, dehan Prezidente CNJTL, Maria Dadi Magno, iha palásiu Prezidente Bairoite, tersa (22/03).

Tanba orgaun eleitorál tenke foti resposabilidade, ba sidadaun balun partisipa iha eleisaun presidensial, maibe rejultadu votu nulu barak, tanba sidadaun sira rasik seidauk iha esperensia vota.

“Ita haree kandidatu na’in-16, ita-nia sidadaun sira barak la hatene vota, tanba failla duni iha edukasuan sivika, ita husu atu iha elisaun segunda volta mai ne’e orgaun eleitorál halo edukasaun sivika”, dehan nia.

Ministru Administrasaun Estatal (MAE), Miguel Pereira de Carvalho hatete, kompeténsia orgaun eleitorál sira hanesan STAE nia papel mak halo edukasaun ba votante hodi vota ho lolos no CNE rasik mós halo edukasuan sivika para sidadaun hodi uza sira-nia direitu iha loron eleisaun bele tuir vota.

Tanba ne’e situasuan balun akontese sosializasaun edukasasun sivika ba sidadun sira, maibé realidade iha eleisaun sidadaun barak vota sala votu nulu barak ida ne’e hatudu katak edukasuan sivika ne’e ladún efetivu.

“Ha’u hanoin ida ne’e ita-boot sira tenke haree sidadaun sira ne’ebé vota sala ida ne’e ita hanaran votu nulu, maibé agora ita rejista iha 12.706 mil votu nulu ida ne’e presiza duni ita-nia orgaun eleitorál sira atu reforsa tan halo edukasaun sivika ba sidadaun sira atubele tuir vota ho loloos”, esplika nia. (*)