“Ha’u apela ba joven sira, imi rona problema iha Baukau, Same, Lospalos, baku malu tuda malu, ohin ha’u dehan hanesan ne'e, o mane ha’u mane, kilat ulun se ba malu, sé tauk sé, ne'e ida uluk, ohin loron ita labele sukat malu forsa, ha’u mane o mane se tauk se ne'e hotu ona lalika hanoin ida ne'e”, dehan nia hafoin hala'o kampaña eleitorál iha munisípiu Dili, tersa (15/03).
Tanba ne'e, lalika preokupa ema ameasa no hakilar dehan tauk ten, tanba uluk funu mak sukat forsa ba malu maibé agora ukun-an ona la presiza simu no hakfodak ho ameasa sira ne'e.
Iha ne'e, Lere mós rona ema balun ne'ebé lansa ameasa ba militante no estrutura FRETILIN ho funsionáriu sira, dehan sé mak tu'u ba kandidatu Lere, nia sei sai husi partidu.
“Ida ne'e, hakarak dehan katak bele sai husi estrtura la buat ida, maibé labele sai husi partidu, tanba FRETILIN la’ós ema ida ninian. Ate ké veteranu sira mós ha’u rona ameasa, se mak tu'u ba Lere imi-nia osan ko'a, osan ne'e la’ós o nia batar ka o nia kuda karau nia folin, osan ne'ebé ohin ita simu, e osan ne'ebé mak agora fahe lemo-lemo ba ema hothotu, maihusi rán no isin, tanba ne'e mak ita labele halo jogu fali ba ida ne'e”, hatete nia. (*)