“Tanba iha interese atu partisipa iha debate ne’e mak horseik, iha 14 marsu 2022, reprezentante legál kandidatu Prezidente Repúblika Fernando Dias Gusmão partisipa iha enkontru preparativu iha Ótel El Legendário, fatin ne’ebé sei hala’o transmisaun direta husi GMN”, dehan Membru Komisaun Organizadu, Francelino Ximenes liuhusi Komunikadu Imprensa, ne'ebé www.tempotimor.com asesu tersa (15/03).

Tanba iha loron segunda (14/03) kandidatu Lú Olo hasoru malu ho reprezentante Kandidatu Fernando Dias Gusmão hodi hatene kona-ba preparativus husi GMN no CNE ba debate.

Maske iha protestu ba oinsá CNE organiza debate ida ne’e, kandidatu Prezidente Repúblika ho númeru 6 hakarak uza opotunidade debate nian hodi hato’o ninia kompromisu polítiku no hatán pergunta ne’ebé de’it Komisaun Organizadora prepara ona.

Ekipa Susesu kandidatu Prezidente Repúblika Francisco Guterres Lú Olo hala’o protestu hasoru CNE relasiona ho hili GMN, empreza televiziva privada, hodi responsabiliza ba transmisaun direta debate kandidatu Prezidente Repúblika, tanba durante ne’e estasaun GMN la hatudu sira-nia imparsialidade no apoiu liu kandidatu ida liufali kandidatu sira seluk iha kampaña ba eleisaun Prezidente Repúblika.

“Ekipa Susesu kestiona CNE nia imparsialidade hili estasaun televiziva GMN ba transmisaun direta debate Prezidente Repúblika nian. Maibé ne’e la siknfika kandidatu Prezidente Repúblika Francisco Guterres Lú Olo sei la partisipa iha debate ne’e”, informa nia.

Kandidatu Prezidente Repúblika Francisco Guterres Lú Olo sempre prontu atu hato’o nia kompromisu polítiku iha oportunidade ne'ebé de’it atu nune’e eleitór hothotu iha Timor-Leste tomak no iha rai-liur, bele akompaña no hatene kandidatu ninia kompromisu polítiku ba tinan lima tuir mai. (*)