Login to your account

Username *
Password *
Remember Me

Oan Soru Konsidera Xanana Lori Nia Envolve Governu Sabraut

Vise Prezidente Partidu Congresso Nacional de Reconstrução de Timor (CNRT), Gil da Costa Monteiro ‘Oan Soru’. Vise Prezidente Partidu Congresso Nacional de Reconstrução de Timor (CNRT), Gil da Costa Monteiro ‘Oan Soru’. Foto Suplay

Tempotimor (Dili)-Vise Prezidente Partidu Congresso Nacional de Reconstrução de Timor (CNRT), Gil da Costa Monteiro ‘Oan Soru’, konsidera Prezidente Partidu CNRT, Kay Rala Xanana Gusmão lori nia envolve iha Governu daualu ne’ebé sabraut, tanba la halo dezenvolvimentu durante ukun.

Maske Ona Soru konsidera Governu sabraut, maibé iha remodelasaun ne’ebé akontese iha tinan 2020, bainhira Prezidente Repúblika (PR), Francisco Gutrees ‘Lú Olo’, husu atu rezign-an, mais Oan Soru ne’ebé asume kargu hanesan Sekretáriu Estadu Asuntu Antigus Kombatentes Libertasaun Nasionál (SEAAKLN) lakohi, tanba hakarak aprende nafatin ho Governasaun Taur Matan Ruak.

"Agaradese ba Maun Xanana uluk lori ha’u mai, bolu mai fali membru do Governu, atu prepara ajuda mós politika ruma, iha governasaun ida sabraut boot ne'e. Bolu liuhusi pontu CNRT, mai sai membru Governu, mais Prezidente haruka karta dehan rezigna, ha’u lakohi sai, tanba saida, hakarak aprende oituan saida mak agora dadauk la'o iha ukun ida ne'e nia laran”, delara nia iha komisiu kampaña eleitorál kandidatu José Ramos Horta iha Munisípiu Likisá, segunda (14/03).

Maske iha loron 23 fulan-janeiru 2022, bainhira Konferensia CNRT ne’ebé hala’o iha Salaun Oka, Osindu-Dili, hodi deside Gil Oan Soru asume kargu hanesan Vise Prezidente Partidu CNRT. Hahú husi ne’e membru Governu daualu ne’e komesa hatudu falta lealidade ba Governu ne’ebé lidera husi Taur Matan Ruak.

Tanba iha Kampaña ba Kandidatu Prezidente Repúblika, José Ramos Horta, Gil Oan Soru konsege kritika Governu ne’ebé lidera husi Primeiru Ministru, Taur Matan Ruak, laiha kapasidade hodi halo dezenvolvimentu iha rai laran.

Ba kestaun ne’e, fonte ne’ebé besik liu Governu hatete, momentu Gil Oan Soru ne’ebé kontinua nafatin envolve iha Governu daualu, tanba Primeiru Ministru, Taur Matan Ruak, mak husu no defende atu kontinua nafatin servisu hamutuk ho Governu, ne’ebé Prezidnete Repúblika la husu atu rezigna-an.

“Gil Oan Soru ne’e Primeiru Ministru Taur mak haruka nia kontinua nafatin iha Governu, la’ós fó karta mak nia lakohi, ne’e la los no Prezidente la husu nia atu rezigna-an. Agora nia falta lealdade ba Governu no Primeiru Ministru, bainhira nia asume kargu hanesan Vise Prezidente Partidu CNRT. Falta lealdade mak halo nia hetan ezonerasaun agora ne’e”, deklara fonte ne’ebé besik liu Governu ba www.tempotimor.com, tersa (15/03).

Nune’e mós iha Kampaña ba kandidatu Prezidente Repúblika Horta nia iha Likisá, Gil Oan Soru kontinua hatudu ninia kritika hodi dehan, Primeiru Ministru (PM), Taur Matan Ruak, kakutak fraku, tanba la halo tuir konferénsia datolu husi Aliansa Mudansa Progressu (AMP).

“Primeiru hakarak agradese ba Xefe Governu ne'ebé laran luak hodi ezonera ha’u, agradese ba ida ne'e. Ita-boot sira rona didi’ak, programa oitavu Governu ida ne'e aprova iha Parlamentu Nasionál, nein 1 cent de'it mós oitavu Governu la halo, tanba saida mak CNRT deside vota abstein iha Parlamentu Nasionál tanba konferénsia dala-tolu Aliansa Mudansa ba Progressu (AMP) ninian Primeiru Ministru la halo tuir, siknifika ninia kakutak fraku”, deklara nia.

Tuir despaxu ne’ebé www.tempotimor.com asesu katak, Primeiru Ministru, Taur Matan Ruak, hasai atuál vise Prezidente Partidu Kongresu Nasional Rekonstrusaun Timor (CNRT), tanba la loial ba konfiansa ne’ebé Governu daualu oferese.

Nune’e iha despaxu Pirmeiru Minsitru nian ho númeru 0356/PM/III/2022 iha loron 11 Marsu, hato’o agradesimentu ba Sekretáriu Estadu Asuntu Antigus Kombatentes Libertasaun Nasionál (SEAAKLN) Oan Soru ne’ebé durante ne’e depozita ona servisu ba Estadu no dezempeña funsaun hanesan governante ida.

“Iha semana hira ba kotuk ha’u hatene ona notísia kona-ba deklarasoens públika sua eselénsia ne’ebé ho substansialmente muda realidade, hodi minimiza kapasidade Governu ba enfrenta difikuldade ne’ebé populasaun no nasaun ne’e sente no deklarasaun públika ne’ebé koloka ne’e kauza ba solidariedade no leadade instituisionál ne’ebé hakesi membru Governu hotu, iha atetude umildade no komitmentu demokrátika, buka solusaun konstrutivu hodi ultrapasa dezafiu ba dezenvolvimentu ne’ebé hakdasak hela iha oin, iha momentu importante ne’ebé enfrenta hela impaktu ekonómiku no sosiál tanba Pandemia COVID-19 no dezastre naturál ne’ebé agravadu tebes”, dehan PM Taur iha nia despaxu ne’ebé www.tempotimor.com asesu, segunda (14/03).

PM mós agradese ba Sekretáriu Estadu Gil da Costa ‘Oan Soru’, tanba durante ne’e hola parte ona iha Governu hodi dezenvolve programa Governu nian ne’ebé ligadu ho Asuntu Antigus Kombatentes Libertasaun Nasionál.

“Liuhusi rekoñese no agradese ba ita-boot nia kontribuisaun no dezenvolvimentu programa Governu ba Asuntu Antigus Kombatentes Libertasaun Nasionál, ha’u la tarde mós hodi manifesta ha’u-nia laran susar no tristeza ba ita-boot nia opsaun ne’ebé dadaun hili ona, hodi viola konfinasa ne’ebé fó ba ita-boot, no kauza mós ba responsabilidade hanesan membru VIII Governu konstituisionál”, salienta nia.

Haree ba áktu ne’ebé governante ne’e komete hodi hamonu dignidade no kapasidade Governu, mak Primeiru Minsitru deside hodi demite membru refere husi Governu daualu.

“Hanoin ba kestaun ne’ebé iha leten no halo reflexaun kle’an, ha’u halo konkluzaun katak, S.E. laiha indikasaun ka kondisaun atu kontinua iha funsaun Sekretáriu Estadu ba Asuntu Antigus Kombatentes Libertasaun Nasionál, tanba ne’e ha’u sei haruka ba Sua Eselensia Prezidente Repúblika atu ezonera ita-boot”, haktenik PM.

Primeiru Ministru Taur mós aproveita oportunidade refere hodi espresa votu susesu ba desizaun ne’ebé membru Governu ne’e hili ona.

“Aproveira oportunidade ne’e espresa ha’u-nia agradesimentu ba servisu ne’ebé halo ona no hato’o ha’u-nia votus susesu ba etapa foun iha moris privadu no profesionál ne’ebé eselénsia hili ona”, deklara Taur. (*)

Rate this item
(0 votes)
Last modified on Tuesday, 15 March 2022 11:14
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« November 2022 »
Mon Tue Wed Thu Fri Sat Sun
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30        

Tempo Timor Networks

Online Counter