“Ita-boot sira nafatin tenke tau seguransa ne'ebé durante ne'e ita-boot sira koloka ona iha STAE munisípiu sira, garante katak 24 oras Polísia iha ne'ebá, laiha sé de'it bainhira mak tenta atu estraga sasán hirak ne'e iha ita-boot sira-nia fatin”, dehan Komadante Jerál Faustino, bainhira partisipa alokasaun boletin Votu ba Munisípiu, iha edifísiu STAE, Kaikoli, sesta (11/03).
Nune'e aproveita oportunidade ne'e, Komandu Jerál apela ba komandante PNTL Munisípiu sira hotu no membru tomak, tenke garante materiál eleisaun ne'ebé asegura husi nasionál to’o munisípiu.
Tanba tuir kalendariu ne'ebé iha, sasán hirak ne'e sei kontinua ba sentru votasaun, maibé molok ba to’o iha sentru votasaun PNTL sira sei iha responsabilidede munisipál.
“Ita hotu hatene katak iha sentru votasaun balun ita-boot sira akompaña, transporte nomós asuntu sira seluk tenke garante katak transportasaun matérial não sensitivu no sensitivu tenke to’o iha fatin sira hotu ho di'ak ho seguru, laiha impedimentu ruma, laiha razaun katak ne'e dezastre ida ne'ebé estrada kotu, laiha razaun ida katak sasán sira ne'e to’o tarde tanba asesu estrada la di'ak, tenke garante ida ne'e, sasán sira ne'e to’o duni tuir oras no tempu ne'ebé lei haruka”, hatete nia.
Ba membru PNTL tomak, no ba komadante sira, lei termina katak iha sentru votasaun prezensa PNTL iha de’it metru 25, maibé iha ne'ebá antisipa kedas katak, kada sentru votasaun sei iha prezidente meza.
Tanba ne'e, kordenasaun entre membru sira ho ekipa tantu prezidente meza importante tebes, atu nune'e bainhira mak PNTL tenke hola inisiativa, tantu atu halo atuasaun.
Komandu Jerál mós apela ba prezidente autoridade munisípál no Administradór munisípiu sira hotu, hodi rekomenda iha autóridade munisípál hotu sei iha komandante Polisia ne'ebé sira bele iha kordenasaun saida de'it iha 24 ligadu ba kestaun seguransa ninia.
“Tanba ne'e kualquer nesesidade saida mak liga ba prosesu sira ne'ebé ita la'o to’o ohin loron, sira tenke prontu atu hamutuk ho Administradór sira, prezidente autoridade sira, nune'e garante nafatin katak dokumentu hothotu ligadu ho aktu eleitorál ne'ebé sei realiza iha dia 19 tenke seguru no buat hothotu iha nia fatin”, afirma nia. (*)
