“Husu ba SEFOPE atu tau iha konsiderasaun hodi rezolve difikuldade sira ne’ebé enfrente husi Diresaun SEFOPE iha munisípiu sira hanesan insufisiénte tranporte operasionál falta ekipamentu online ba sistema produz kartaun nomós mobiliáriu hanesan meza no kadeira inklui armáriu”, dehan Alexandrino Cardoso iha PN, tersa (09/03).
Ba kestaun ne’e, Sekretáriu Estadu Profesionál Formasaun no Empregu (SEFOPE) liuhusi Diretór Jerál, Paulo Alves rekoiñese Diresaun siira iha Munisípiu durante ne’e menus fasilidade hodi halo atendimentu.
“Haree ba preokupasaun hirak ne’e, agora ita laiha kartaun orijinál ne’ebé mak atu imprime, tanba blanku hotu ona”, esplika Paulo Alves, iha SEFOPE, Kaikoli, kinta (10/03).
Maske SEFOPE halo ona konkursu ba sosa ona ekipamentu, mákina imprime maibé blanku atu mak laiha, tanba ne'e Diresaun Munisipal sira produz kartaun evidénsia ho manual.
Ba ekipamentu sira ne’ebé hanesan kadeira, meza, armariu inklui sistema produsaun sira, tanba iha dezafiu ne’ebé hasoru mak orsamentu, bainhira iha hafoin bele atende pedidu sira husi munisípiu.
“Tanba de’it orsamentu mak ita paradu tiha, parese tinan oin mak ita sei halo proposta orsamentu hodi rezolve problema sira liliu ba mobiláriu sira”, informa nia. (*)