“Buat hotu la'o ho di'ak no normál, Partidu Politiku no Kandidatu Independente sira kontinua respeita orden ne'ebé fó sai ona husi CNE”, dehan Koordenadór Advokasia FONGTIL, Ivo Colimão Lay Costa, iha Salaun FONGTIL, Kaikoli, sesta (04/03).

Tanba Sosiedade Sivil halo observasaun katak situasaun iha terenu la'o ho saudavel no harmonia hela.

Nune’e sei halo observasaun másimu iha terenu atu labele envolve labarik sira iha aktu eleitorál sira hanesan ne'e. Tamba hakarak ordem husi Komisaun Nasional Eleisaun (CNE) nian labele monu ba rai.

Bainhira deteta aktu sira ne'e Sosiedade Sivíl sei formula ba relatóriu no manda ba CNE maibé ho justifikasaun sira hanesan fotografia no vídeo mak CNE sei foti pozisaun ka desizaun administrativa sira hasoru Partidu Politiku no Kandidatu Independente sira ne'ebé iha ninia Kampaña envolve labarik minoridade sira.

“Espera iha kampaña ida ne'e la’o ho dia’k harmonia no Saudável. Nune'e povu sira bele aprende Edukasaun Sivika kona ba Politiku iha situasaun ida ne'e”, afirma nia.

Tamba kampaña ne'e, la'ós Partidu Politiku no Kandidatu Independente sira atu Públika de'it sira-nia programa politika, maibé oinsá atu eduka povu kompriende liután lala'ok husi atividade eleitorál.

Nune'e husu ba sidadaun hotu atu respeita malu tanba konviksaun pólitika ema ida-idak nian la hanesan. Tanba ne’e, labele perturba malu iha tempu kampaña.

Iha ne’e husu mós ba líder Partidu Polítiku no kandidatu sira atu kuidadu linguajen labele insulta no trata malu iha tempu kampaña nune'e labele kadi kroat iha povu nia le'et.

“Imi-nia insulta malu ne'e bele prezudika fali militante sira ne'ebé partisipa iha kampaña”, afirma nia. (*)