“Iha loron ida ohin, kandidatu Mariano ‘Asanami’ Sabino la halo atividade kampaña tanba ohin dedikadu ba loron veteranu ninian, veteranu ne'ebé luta ba independénsia Timor-Leste ninian”, dehan António da Conceicão, iha Sede PD, Kolmera, kinta (03/03).
Tanba kalendáriua nasionál ne’ebé deside hahú husi loron 1 to’o loron 3, fulan-marsu, tinan 2019, komemora Loron Nasionál Veteranu nian ho forma atu fó onra ba kontribuisaun husi mártire, kombatente no veteranu ne’ebé mak luta ba independénsia Repúblika Demokrátika Timor-Leste (RDTL).
Tanba ne’e, PD iha nia hanoin ida mak dignifika no fó onra ba erói sira ne'ebé mak oferese nia-an ba Timor-Leste nia ukun rasik-an.
“Ida ne'e mak dignifika veteranu sira no fó honra ba eróis sira hotu ne'ebé mate ba ukun rasik-an ninian, tanba ida ne'e mak kandidatu Mariano ‘Asanami’ Sabino ohin presta de'it omenjen hapara ninia atividade kampaña loron ohin nian iha Munisípiu sira nomós iha rejiaun espesial Oekussi”, afirma nia.
Nomeiasaun Prezidente PD mak tenke hakruuk ba veteranu ne'ebé sakrifika-an ba rai Timor nomós nu'udar unidade nasionál ba Timoroan hotu.
“Ohin Partido Demokrátiku (PD) ne'ebé mak nomeia enjeñeiru Mariano ‘Asanami’ Sabino hodi oferese nu'udar kandidatu nasionál hakarak atu hakruuk ba veteranu sira hotu nia sakrifisiu ba Timor-Leste ukun rasik-an e hakarak fó onra ba loron ida ohin nu'udar nia kandidatu unidade nasionál Timor-Leste ninian hodi hametin sitiaussun sira hotu ne'ebé mak durante ne'e ita hothotu halerik”, deklara nia.
Ho ida ne’e, Estrutura PD ho nia Ekipa ba Jardin dos eróis Metinaro hodi kari aifinan no presta omenjen ba veteranu sira ne'ebé durante dedika-an ba Rai Doben Timor-Leste. (*)