“Ohin hasoru malu ho sua esélensia Prezidente Repúblika, ami ko'alia asuntu tolu, ida mak kona-ba seguransa ba prosesu kampaña eleisaun prezidensiál, ida seluk mak ba Covid, dengue problema sira ne'ebé ita iha, atinje saúde públik sidadaun sira-nia, ida seluk mak dezastre naturál ne'ebé prezudika ita-nia sidadaun sira-nia moris”, dehan Taur hafoin hasoru malu ho PR Lú Olo iha Palasíu Prezidensiál Bairopite, sesta (25/02).

Ba seguransa kampaña Governu garantia ba hodi kria kondisaun hothtou, atu eleisaun la'o ho di'ak tuir regra sira ne'ebé iha, hanesan mós esperensia iha tempu pasadu.

“Dezastre naturál ami preokupa los, sua esélensia Prezidente nia fó hela mensajen para ke Governu la bele taka matan ba ita-nia sidadaun sira ne'ebé dadaun hetan dezastre”, informa nia.

Kona-ba dengue Governu preokupa tanba labarik hamutuk na'in-30 resin mate, númeru rejistu rihun-2-resin no Ministériu Saúde halo esforsu atu fó apoiu atu evita no reduz númeru mortalidade.

Maibé kestaun ne’e mak, tenke tau matan ba ambiente ne’ebé Ministériu Saúde hatete, beibeik katak bazu sira bee iha laran, roda sira bee iha laran ne'e tenke kuidadu atu la bele prezudika fali ba oan nia saúde no oan nia moris.

“Entaun sua esélensia mós preokupa ida ne'e, e ami simu mensajen sua Prezidente nian, so ha'u sei transmite ba Ministériu saúde para halo esforsu hotu atu ajuda, la'ós de'it sira ne'ebé afetadu husi dengue, nomós sira ne'ebé dezastre naturál, ba mós sira ne'ebé afetadu husi Covid-19”, hatete Taur. (*)