Liuhusi karta, ho loron 21 fulan-fevereiru 2022, Prezidente Repúblika informa ba Prezidente Parlamentu Nasionál katak sei goza férias iha 28 fevereiru nomós iha loron úteis husi 1 to’o 16 marsu 2022, iha territóriu nasionál.

“Ha'u lisensa hahú iha dia 28 agora, haruka ha'u-nia surat ba Parlamentu”, informa PR Lú Olo iha Kampus UNTL Hera, kuarta (24/02).

Tuir Estatutu Titulares Órgauns Soberania, (númeru 4 artigu 10, Lei n°7/2007, 25 jullu altera husi Lei n°7/2017, 26 abril), tinan-tinan, titular no membru órgaun soberania sira iha direitu ba períodu férias loron 30.

Maibé, tanba motivu servisu, tinatinan Prezidente Repúblika, Francisco Guterres Lú Olo, la hasai férias tuir lei determina.

Tanba Prezidente Repúblika órgaun unipesoál (ema ida de’it mak kaer), nia sei hala’o nafatin ninia kna’ar tuir Konstituisaun haruka durante períodu férias ne’e.

Ba Prezidente Repúblika Lú Olo ne’ebé husu ferias annual atubele aproveita hodi hala’o kampaña ba nia kandidatu Prezidente Repúblika 2022-2027 ne’ebé tuir kalendáriu ne’ebé publika Jornál Repúblika loron 15 janeiru 2022, kona-ba eleisaun Prezidensiál no períodu kampaña eleitorál hahú husi loron 2 to’o 16 marsu 2022.

Bainhira ko’alia kona-ba estabilidade iha kampaña maske líder sira lakohi tur hamutuk, maibé Prezidente Repúblika hanoin líder hori uluk kedas tuir kultura sira hothtotu aseita tempu ba kampaña nian, atubele husik povu ida ne'e hakmatek, hili tuir sira-nia hakarak, hili Prezidente foun.

“Ha'u hanoin katak ita lalika kahur fali ita-nia postura, sentimentu ba fali prosesu ida ne'ebé ita hotu hakarak atu la'o di'ak la'o ho transparensia, ne'ebé husik ba povu ida ne'e mak sei hili, fihir nune'e ita bele la'o hamutuk ba oin”, apela Xefe Estadu. (*)