Maske Timor-Leste ukun-an tinan 20 ona, maibé prosesu sirkulasaun ahí-eletrisidade kontinua sai problema ba povu iha teritóriu tomak, hanesan mós ho Klakukoan balun.

Reprezentante Komunidade Aldeia We-Bikas no Sub-aldeia Bitirai, Leonardo Soares afirma, dadauk xefe família hamutuk atus-ida Ualu-Nulu (180) Iha Suku Klakuk to'o agora kontinua uza lampu hodi fó naroman sira iha tempu kalan, tanba laiha eletrisdade.

“Komunidade ka Xefe Família hamutuk 180 iha Aldeia We-Bikas no Sub-aldeia Bitirai, Suku Klakuk, Postu Administrativu Fatuberliu, Munisípiu Manufahi, to'o agora sira la asesu ba eletrisidade”, informa nia hafoin remata audénsia ho Komisaun F trata asuntu infraestrutura iha Parlamentu Nasionál (PN), kuarta (06/10).

Iha tinan 2020, kompaña Duromalu hetan fi'ar husi Governu hodi kaer projetu eletrisidade ba Klakukoan sira, ne’ebé hari’i ona rin eletrisidade maibé to'o obra laiha kontinuasaun.

"Obra ne'e soe hela de'it, la hatene, tanba kestaun saida no problema saida, tanba ami haree ninia rin mak hari’i, maibé fiu seida'uk dada”, hatete nia.

Ba problema refere, iha fulan-agostu tinan 2021 parte Eletrisidades Timor-Leste, Empreza Públiku (EDTL.ep) orienta ekipa hodi tun ba halo  levantamentu ba dadus, maibé seida'uk iha rezultadu.

Dadauk, komundiade hamutuk na'in-180, iha loron (06/10) delega ona sira-ninia reprezentante hamutuk na'in-5 hodi hasoru malu ho Komisaun E ne’ebé trata asuntu Infraestrutura, hodi ko'alia direta problema ne'e ba deputadu-sira oinsá mak bele aprezenta iha plenária, 

Husu mós komisaun E atu kria audénsia ho membru Governu liliu Ministru Obras Públika (MOP) atu  diskute oinsá mak bele dada eletrisidade ba Klakukoan sira.

Reprezentante Komunidade Adão de Jesus hatete, Governu presiza dada ahi-eletrisidade ba suku refere tanba área poténsia iha ne'ebá presiza enérjia eletrisidade.

Tanba iha suku Klakuk ne'e, Ministru Agrikultór no Peska (MAP) rasik hari'i kolan-ikan ida iha ne'ebã, inklui Área Edukasaun, Saúde, Igreja sira presiza ahi. (*)