Tempotimor (Dili) – Ministru Saúde interino, Bonifácio Maucoli fó atensaun ba komunidade iha rai laran, atu labele konsume na'an fahi mate tan moras. Tanba sei fó impaktu ba saúde.

"Kuandu ema konsume na'an ne'ebé mak afetadu husi virus ne'e, nia impaktu ema mós kona hotu. Ida ne'e mak durante ne'e ami halo ona apelu, para ema labele konsume na'an fahi ne'ebé mate tan moras," dehan Ministru Saúde interinu ne'e iha Palásiu Governu,  Kuarta (25/09/19).

Nia afirma,  virus ne'ebé iha ne'e mai husi kutun animál nian. "Moras ne'e, mai husi kutun animál sira ne'e. Hanesan akontese iha fatin-fatin. Dalaruma, moras ne'e importa fali husi nasaun seluk mai. Tanba ita fronteira ho Indonézia. Dalaruma hatama manu, animál sira ne'e bele da'et fali ba ita nia animál rai laran," Maucoli esplika.

Parte saúde no Ministériu Agrikultura no Peskas, tuir Maucoli, halo ona kooperasaun inklui aprezenta ona Projetu de Lei ba Governu atu halo regulamentu ba sanitáriu internasionál.

"Ami aprezenta ona Projetu de Lei ba Governu atu halo regulamentu ba sanitasaun internasionál nian, para bainhira sasán sira tama ne'e iha lei para regula sira, atu nune'e labele lori fali moras mai Timor," dehan Maucoli.

Parte saúde, nia dehan, seidauk halo identifikasaun moras ne'e naran saida,  maibé atu identifika moras ne'e parte veternária mak bele halo identifikasaun.