Ho númeru kazu ne’ebé iha Ministru Prezidénsia Konsellu Ministru (MPKM), Fidelis Leite Magalhães, husu ba sidadaun sira ne'ebé simu ona vasina doze daruak atu kontinua simu vasina datoluk ka booster hodi kombate Covid-19 iha Timor-Leste.
“Husu mós ba komunidade hirak ne’ebé seidauk simu vasina atu hakbesik-an ba sentru saúde sira hodi simu vasina nomós ba sira ne’ebé vasina dalaruak ona bele kontinua simu vasina datoluk nian”, dehan Fidelis Leite iha Palásiu Governu, kinta (03/02).
Tanba iha semana ikus ne’e, númeru kazu aumenta ho siknifikante no dadus ne’ebé hatudu iha loron kuarta (02/02) fó sai husi Ministériu Saúde hatudu katak daudaun ne’e kazu ativu hamutuk ema na’in-268, entre númeru ne’e ema na’in-266 iha Dili.
Husi kedas inísiu pandemia nian, Timor-Leste rejista kazu infesaun husi Coronavírus hamutuk ema na’in-20136 no ema na’in-122 mate ona tanba infetadu ho SARS-CoV-2.
Governu apela ba sidadaun hotu nia kolaborasaun atu adopta medida sira prevensaun nian hanesan uza máskara, fase liman beibeik, evita atu tau liman ba oin, mantein distánsia pelumenus metru ida, liliu ho ema sira seluk no evita halibur-malu ho ema barak.
Aleinde kuidadu sira ne’ebé adopta ba prevensaun dengue nian, Governu apela ba populasaun atu mantein vijilante no adota mós medida preventiva sira ba Covid-19, ne’ebé haree ba númeru infetadu ho SARS-CoV-2 no propagasaun variante Omicron iha Timor-Leste ne’ebé daudaun sa’e maka’as
"Governu apela ba populasaun hotu katak karik iha sintoma sira hanesan isin-manas, me’ar, kakorok moras, konstipasaun no difikuldade respiratória ka susar atu dada iis, bele ba iha sentru sira saúde nian atu halo lalais diagnóstiku ba moras, atu nune’e bele evita situasaun sira ne’ebé grave liu”, afirma nia. (*)