Dadauk mate isin sei rai hela iha mortuariu HNGV hodi hein prosesu koordenasaun entre família matebian ho Parlamentu Nasionál kona-ba serimónia funeral hodi haloot saudozu nia isin mate.

Família matebian Venancio Tavares hatete, nu’udar alin ida sente triste tanba lakon saudozu Silvino Adolfo Morais ne’ebé hanesan aman nomós maun boot ida iha família nia laran.

 "Ha’u-nia sentimentu primeiru hanesan, ami família boot, ne’ebé ami hothotu, inan aman laiha hotu ona, katuas sira liha hotu ona, nia mak ami-nian katuas, nia mak hanesan ami-nia maun boot, hanesan ami-nia aman haree ami hothotu. Tanba ne'e triste tebtebes bainhira, lakon nia, laran triste tebetebes tanba nia mak hanesn ami-nia ema ida númeru um iha ami-nia familia”? dehn nia ba www.tempotimor.com iha mortuariu HNGV, Bidau, tersa (04/01).

Durante ne'e saudozu fó ona kontribuisaun hanesan timoroan, desde 1974, kuandu mosu partidu, nia partisipa kedas, hanesam lutador ida, kaer kilat iha ai-laran no akompaña ho komandante Cabo Januario, ne’ebé nu’udar membru di'ak ida.

To'o iha tinan 1979, militar Indonézia konsege kaptura saudozu, maibé iha momentu ne'eba saudozu nia kontribuisaun nunka mais para to'o ohin loron.

Saudozu rasik iha maun-alin barak, subriñi ho beioan ne’ebé barak. Saudozu mós iha oan hamutuk na'in-haat, feto rua no mane rua ne’ebé forma família hotu ona.

Parte husi família rasik mós la espera saudozu atu hakotu iis, tanba durante ne'e nia kondisaun di'ak hela.

Nune’e  iha loron 19 dezembru 2021, bainhira nia ba konsulta iha ospital Maliana, doutor sira dehan katak nia moras fuan ho estomuk de'it, entaun nia moras seluk laiha nia isin di'ak hela.

Ho ida ne'e sira lori fali mai Batugade depois  dadersan derepente nia moras entaun mai halo tratamentu iha Klinika Atabae, hafoin ida ne'e mak sira lori mai deskansa iha Rezidénsia Tasitolu no lokraik lori kedan Hospital Nasional Guidu Valadares halo tratamentu maibé la konsege salva vida.(*)