"Enkontru ida ne'e Vise Ministru Saúde mak husu atu enkontru ho sua eselénsia Primeiru Ministru, relasiona ho vírus variante foun ne'ebé mak iha, em primeiru ami hakarak liga kedas ho variante foun ne'e ita vasina ne'ebé mak ita hala'o ona, liliu ho vasina AstraZeneca no Sinovac ita haree katak iha primeira doze iha atinje pursentu 80 (80%) ona, agora segunda doze seidauk to'o pursentu 70 (70%) maibé ita hakarak aselera to'o pursentu 80%”, dehan Ministra Odete hafoin reuniaun ho Primeiru Ministru (PM), Taur Matan Ruak iha Palásiu Governu, segunda (03/01).
Alvu ne'ebé mak Governu hakarak atu tama fulan-dezembru tinan 2021 vasina tenke atinje pursentu 80 maibé la konsege tanba ida ne'e mak foin to'o de'it pursentu 69 (69%).
"Iha ita-nia rain iha fasilidade saúde ne'ebé kiak tebetebes ita hakarak hothotu hetan vasina atu nune'e labele lori ita ba ospitál labele lori ita ba moras todan”, esplika nia.
Maibé iha planu ne'ebé mak Ministériu Saúde prepara atu implementa vasina doze datoluk ba sidadaun sira iha loron 04-09 fulan-Janeiru tinan2022.
"Iha parte importante mak ha'u hakarak ko'alia ho señór Primeiru Ministru oinsá ko'alia kona-ba vasina terseira doze ne'ebé mak atu implementa, ami iha planu karik atu implementa iha tempu badak nia laran entre dia 04 to'o 09 fulan-janeiru tinan 2022”, afirma nia. (*)
