"DELTA Variant obriga atu muda lalais ita-nia estratejia prevensaun no mitigasaun. Timor hahú mate tanba COVID-19, la'os ona mate ho COVID-19", afirma Nelson Martins, liuhusi karta komunikadu ne'ebé www.tempotimor.asesa, segunda (23/08).
Maske sidadaun barak mak simu ona vasina dala-rua, maibé ida ne'e la fó protesaun másima, no persiza ajuda ho medida saúde públika seluk.
"Lockdown, kuarentena, uza máskra, fase liman no halo distánsia fiziku sei efetivu uainhira implementa loloos no rigorózu hanesan tinan kotuk", dehan nia.
Rezumu importante husi dadus COVID-19 ne'ebé fó sai iha loron domingu (22/08/2021) husi Sentru Integradu Jestaun ba Krize (SIJK) hatudu, númeru kazu kontinua as liliu iha Dili (183) tuir Covalima no Manufahi.
"43,0 % (husi 235) mak hatudu simtomas ou gejala. Ida ne'e hatudu katak situasaun COVID-19 aumenta gráve iha ita-nia leet kompara ho fulan hirak liuba ne'ebé kazu asymptomatic mak barak. Ita tarde ona iha prosesu detesaun sedu hodi fó protesaun sedu. 46,7% ( husi 235) mak simu ona Vasina: ida ne'e hatudu katak "vasina mesak la konsege prevene maluk sira ne'e hetan infeksaun. 29 % husi sira mak simu ona doze 2 ou kompleta Vasina", haktenik nia.
Maske populasaun sira simu ona vasina sei hetan moras kma'an de'it, maibé sira iha poténsia hadaet ba ema seluk no iha posibilidade nafatin bele aumenta ba moras gráve hanesan akontese dadauk agora ba kazu 1 ka 2 de'it.
"Maluk sira ne'ebé mate ohin no loron hirak liuba tama ba sentru tratamentu COVID-19 ho sindroma insufisiénsia respiratória aguda (SIRA) ou ho liafuan English hanaran: Acute Respiratory Distress Syndrome (ARDS) no mate tanba parajen respiratoria & falensia orgaun lubuk ida ou multiple organ failures. Iha ne'e hatudu katak matebian sira ne'ebé mate iha loron 4 ikus ne'e maioria "mate tanba COVID-19", deklara nia.
Tanba ne'e husu ba sidadaun hotu atu kuidadu ida-idak nia-an, família no ema sira ne'ebé hadomi, hahú dadauk ona izola-an mesak iha uma.
"Maske vasina kompletu ona mós persiza uza nafatin máskra, fase liman no halo distánsia fízika hasoru Variante Delta ne'e", hatete nia. (*)
