Tempotimor (Dili)-Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo deklara, SARS-CoV2 hamate timoroan mane ida ho idade 59 iha Izolamentu Vera Cruz, loron 27 fulan-maiu 2021, maizoumenus tuki 11:50 otl.
Matebian ne'e hela iha Mascarenhas, Postu Administrativu Vera Cruz, iha loron 27 fulan-maiu dader maizomenus tuku 3:00 madrugada ba halo tratamentu iha Hospital Nasionál Guido Valadares (HNGV) ho keixa isin-manas, muta, kabun laran moras durante loron 2 iha uma.
Matebian iha mós istória operasaun fatuk iha rins hafoin halo ezame fiziku no ezame komplementar sira seluk, médiku sira to’o iha diagnóstiku traballu (working diagnosis) peritonite ho septic shock.
"Deteta mós pozitivu SARS-CoV2 ho Cycle Threshold (CT) N2gene 40,8, Egene 38,8 husi HNGV transfere ba fatin izolamentu Vera Cruz, no iis kotu iha tuku 11:50 oras timor-leste (otl) ho multiple organ failure”, dehan Rui liuhusi komunikadu imprensa, kinta (27/05).
Entretantu, totál mate (óbitu) iha Timor-Leste hamutuk ema na’in-15 iha Dili 14, Likisá na'in-1 inklui mós sidadaun Xineza na'in-1 ne’ebé mate tanba Covid-19. (*)