Tempotimor (Dili)-Diretór Klínika Hospital Nasionál Guido Valadares (HNGV), Flávio Brandão informa, pasiénte hamutuk na’in-150 mak dadaun baixa hela iha HNGV no husi totál pasiénte hirak ne'e maizumenus nain-30 mak kategória kazu todan.

"Kuaze moras sira ne'ebé baixa ne'e maizomenus besik 30 mak ita dehan kazu ne'ebé kategória todan, maibé sira ne'ebé kategória kazu kaman kuaze 100 itál ne'ebé baixa hela iha Hospital Nasionál Guido Valadares (HNGV)", dehan nia iha nia kna’ar fatin Hospital Nasionál Guido Valadares (HNGV) Bidau, segunda (24/05)

Maibé, HNGV mós komesa loron 23 fulan-maiu kalan hahú rejistu hikas moras ho númeru ne'ebé a'as kompara ho loron hirak liuba.

"Komesa horikalan de'it pasiénte ne'ebé mai husi triajen 179 no pasiénte sira ne'ebé mai ita halo atendementu hanesan kazu emerjénsia pois sira fila ba uma”, informa nia.

Maske nune’e, moras ne'ebé rejistu susar atu hatete, tanba iha ida-idak nia departamentu, maibé númeru pasiénte ne'ebé iha kompara ho semana kotuk nian komesa sa'e fali ona.

Pasiénte ne'ebé rejistu mai husi Dili nomós munisípiu sira seluk no ospitál rejionál sira ne'ebé dadaun ne'e baixa iha ospitál nasionál

Husi númeru pasiénte ne’e seidauk to'o hanesan ho antes iha situasaun normál nian maibé komparasaun ho semana kotuk agora númeru aumenta filafali.

“La hatene tanba fatores saida, maibé kompara ho semana kotuk, agora númeru aumenta as liu fali semana kotuk nian”, relata nia.

Tanba iha semana kotuk kuaze káma mamuk pursentu 50, maibé dadaun pursentu 25 mak mamuk, kuaze prenxe hotu fali ona.(*)