Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, sira simu karta agradecimentu husi estudante no profesór sira.
“CIGC-SS simu mensajen agradesimentu & manifestasaun apoiu, liu husi karta individual 56, husi estudante sira Centro de Ensino e Treinamento Shallom, iha Aldeia 20 de Setembro, Bebobuk, Dili”, deklara Rui liuhusi Zoom Conference, sábadu (27/03).
Iha mós karta husi profesór no diretór eskola. Rui dehan, la biban atu lé hotu kedan, maibé eskolla balun hodi reprezenta sira hotu.
Tuir karta manifestasaun apoiu ne’ebé le sai ‘’Ha’u-nia naran Elisangela Ximenes Monteiro, Tinan 10. I love you. Ha’u-nia agradesimentu ba linhe de Frente ne’ebé mak ajuda ona ita-nia ema ne’ebé mak moras, ou halo sala imi sempre ajuda, no sempre kuida. MFB (Maromak Fo’o Bensa) ba linhe frente sira hanesan: Polísira, doutór sira,enfermeiru sira, forsa F-FDTL sira nsst. Hakuak bot husi Elisangela Ximenes Monteiro’’.
Rui mós fó sai mensajen husi Jordan Vedry de Quintas 4oAno/B: ‘’Haree saúde, labele haluha uza maskra. I love Timor-Leste. Agradesimentu ba Ministério de Saúde no ba maluk sira servisu iha linha frenti’’
Ikus-liu hakarak dedika ‘’Rosas husi Tatiana Paya Vero Ximenes Fernandes, ba kolega sira hotu ne’ebé dedika-an tomak iha linha de frente.
Hakuak bo’ot mós ba Elisanjela, Jordan, Tatiana ho kolega sira hotu iha eskola Centro de Ensino e Treinamento Shallom.
Kuidadu-an nafatin iha uma, rona inan-aman ho profesór sira nia konselllu. Keta haluha fase liman bebeik ho bé & sabaun ka dezinfetante ruma, labele kose liman ba inus, ibun no matan, hela iha uma, lalika sai wainira la presiza. (*)