Ekipa konjuntu Prevensaun Covid-19 ne’ebé preparadu hodi hein desizaun atu lori Líder, maibé nia Asesor na’in-2 ba izolamentu ida iha Kapitál nasaun, hahú loron 28 fulan-marsu dader.

Líder máximo ho nia asesor na’in-rua ne’e hafoin teste swab iha loron hirak no Laboratóriu Nasional Saúde (LNS) fó sai rejultadu ba Sentru Integradu Jestaun Krize hamutuk ho ekipa prevnsaun Covid-19 prepara hela fatin atu foti pasiénte sira ne’e.

Bainhira www.tempotimor.com tenta konfirma ho pesoál balun ne’ebé besik los iha autoridade sira, hatete sira foti ona asesor na’in-2.

“Sim, kazu ne’e los, nia asesor na’in-rua ami foti ona,” dehan fontes ida ne’ebé husu labele publika nia naran, domingu (28/03).

Líder ne’ebé konfirmadu pozitivu ne’e ekipa prepara hela fatin hodi hein desizaun ba foti iha fatin ne’ebé nia hela iha Kapitál Díli.

“Pozitivu tanba ne'e nia fatin ami prepara ona nunee hein de’it desizaun husi leten dehan bele foti mak ami ba foti kedan”, fonte ne’e relata.

Iha mós Espesialista iha Laboratóriu Nasional Saúde ne’ebé servisu iha swab, hatete kazu Líder máximu KHUNTo konfirmadu ho asesor ne’ebé tama ona sala izolamentu.
“Sim, ida ne'e mak nia asesor sira ami foti tiha ona. Asesor na’in-rua ne'e ba tiha ona sala izolamentu”, afirma nia

Dadaun ne’e ekipa seidauk ba foti lider Maximu KHUNTO ne'e iha ninia rezidensia, tanba sei hein despaisu.

“Agora Bou nian ne'e mak to'o agora seidauk. Ami entrega ona ba sira hirak iha leten ne'eba, orsida deside dehan bainhira mak ba foti ami sempre prontu hela de'it”, dehan espesialista ne’e:

Maske seidauk foti maibé ekipa prepara ona fatin no hein koopera atubele lori ba fatin refere..

“Ami ba ona ko'alia ba nia aseita ou la'e mas ami labele obriga nia, maibé ami entrega ba sentru Integradu jestaun Krize mak organiza ida ne'e tanba sentru ne'e iha kedan titular nia okos ne’ebé sira organiza ba mak ita ba foti”, deklara.

Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, sidadaun hotu hanesan, tanba servisu Sentru Integradu Jestaun Krize no ekipa Konjuntu servisu iha terenu ne’e la haree ba ema maibé hothotu tenke regra.

“Iha ne’e ita la ko’alia ema nia naran, ita ko’alia kona-ba ema ne’ebé detetadu pozitivu”, esplika Rui.

Dadaun ne’e ekipa konjuntu prevensaun ba Covid-19 iha ona dalan atu ba foti líder máximu KHUNTO ho inisial JDSBN iha ninia rejidensia Manleuana-Díli. (*)