Maske, governu aplika ona serka sanitária no konfinamentu domisiliáriu obrigatóriu iha sidade Dili, maibé komunidade kontinua halo movimentu ho normal nune’e númeru kazu kontinua aumenta.

“Ohin ita iha tan kazu foun na’in-21 ne’ebé na’in-20 iha Dili no na’in-ida iha munisípiu Baukau, husi númeru kazu ne’ebé iha mak kazu iha Dili atinje ona 217”, dehan Rui liuhusi zoom konferénsia iha Sala Situasaun Sentru Integradu Jesaun Kriste (SS-SIJK), kuarta (24/03).

Husi kazu pozitivu foun ne’e kompostu husi mane na’in-11 no feto na’in-10, ne’ebé iha na’in 17 mak asintomátiku no na’in haat mak sintomátiku. Nune’e kazu ne’ebé ativu iha izolamentu Vera Cruz no Tasi Tolu hamutuk na’in-247.

Haree husi númeru kazu iha loron 23 to’o 24 fulan-marsu, laboratóriu nasionál halo ona teste ba amostra hamutuk 971 ho PCR inklui halo ona teste PCR ba ema na’in-304 ne’ebé aprezenta pedidu ba Sala Situasaun Sentru Integradu Jestaun Krize hodi halo viajen ba munisípiu.

Entretantu, kazu pozitivu iha Dili prodúz ona klaster 42, Baukau 7, Vikeke tolu inklui ida iha Lautein.(*)