Nia dehan, atu uza ai-moruk vasina ne'e, depende ba politika Ministériu Saude (MS) nian atu bele utiliza.
"Ai-moruk Covid iha ona, agora ita hein politika ministériu saúde nian atu hili vasina ida ne'ebé, ne'e ministra saude mak tenke desidi depois politika saida mak ita atu utiliza", MNEK informa hafoin reuniaun Konsellu Ministru iha palasiu governu, Tersa (29/12).
Nia mós dehan, doador sira ne'ebé ajuda atu halo vasina ba moras Covid-19, sira nia prioridade mak ema ne'ebé iha risku boot ba pandemia refere.
"Prioridade ezemplu doador sira kuandu hakarak ajuda, sira nia prioridade sei front line ho ema ferik katuas sira sei vasina uluk, depois mak sira seluk. Purtantu ita hein hela politika saida mak ministeriu saude aprezenta hodi Konsellu Ministru aprova", nia akresenta.
Nia mós dehan, ai-moruk vasina moras Covid-19 konfirmadu ona, no ninia kestaun maka sei depende ba de’it ba politika Ministeriu Saude nian.
"Ai-moruk barak komfirmadu hotu ona, ai-moruk ema uza ona, ita mak seidauk hatene Ita atu uza ida ne'ebé, ita hein hela politika husi saúde", nia tenik.
Nia afirma, ai-moruk vasina Covid-19 ne'e, nasaun Australia mak iha komitmentu atu ajuda, maibé Indonézia mós iha hakarak ajuda, maibé seidauk iha informasaun husi rai seluk no hein hela politika husi ministeriu saúde. (*)