"Ohin Konsellu Ministru iha reuniun estraordinária ida, delibera atu propoin dala ida tan ba Prezidente Repúblika deklarasaun Estadu Emerjénsia ba loron 30," dehan Ministru Prezidénsia Konsellu Ministru (MPKM), Fidelis Leite Magalhães, liuhusi konferénsia imprensa, iha Palásiu Governu, Segunda (03/08).
Nia esklarese, objetivu husi Estadu Emerjénsia (EE) ne'e atu proteje saúde públika aumezmu tempu atu asegura sistema saúde ne'ebé la forsa bainhira surtu ruma mosu fali.
"Ho Estadu Emerjénsia ne'ebé ita husu agora haree liu atu halo restrisaun ba direitu asegurasaun internasionál, sirkulasaun no fiksasaun rezidénsia no direitu ba rezisténsia, direitu tolu ne'e mak sei hetan restrisaun ho implementasaun ba iha Estadu Emerjénsia ne'ebé governu sei hakerek karta husu ba Prezidente Repúblika para deklara Estadu Emerjénsia", teni nia.
Estensaun Estadu Emerjénsia, nia dehan, prosesu normál hanesan baibain, Prezidente Republika deklara tiha no sei pasa ba Parlamentu Nasionál.
Nune'e, nia informa, estensaun Estadu Emerjénsia ba loron 30 dadaun ne'e, populasaun lalika preokupa, tanba atividade iha ai-laran kontinua la'o nafatin.
Iha parte seluk tuir informasaun ne'ebe tempotimor.com asesu, ema sira ne'ebe hakat liu rai ketan husi Indonezia mai Timor Leste liu ona atus rua no barak agora iha hela Kuarentena obrigatoriu hodi hein rezultadu teste antes sira livre. Maibe iha mos deskonfiansa kona ba ema balun mai la tama kuarentena. (*)