Tempotimor (Dili) – Bankada FRETILIN iha Parlamentu Nasionál, husu ba VIII Governu, liuliu Ministériu Edukasaun, Juventude no Desportu (MEJD), atu hatuur didi'ak sistema edukasaun iha rai laran, hodi bele hadi'a kualidade edukasaun. Liuliu ba profesór no estudante sira.

"Governu tenke investe maka'as iha área edukasaun. Tanba rekursu umanu ida ne'e, laiha rohan. Tan ne'e, ita nia rikusoin sira seluk bele hotu. Maibé, rikusoin ida ne'e nunka mais bele hotu. Tanba ne'e, tenke investe maka'as iha área edukasaun," dehan Francisco Miranda Branco, Vise Prezidente Bankada FRETILIN iha Parlamentu Nasionál, Kuarta (25/09/19).

Deputadu ne'e, husu Governu atu revé filafali sistema edukasaun nasionál nian.

"Governu iha obrigasaun tenke revé fali sistema edukasaun nasionál atu nune'e bainhira estudante sira remata iha universidade servisu kedas. Maibé, se la hetan servisu Governu apoiu sira hodi hetan kréditu, hodi kria servisu ba ninia-an rasik," dehan Branco.

Nia afirma,  Governu presiza halo komunikasaun ho igreja. Tanba, parte igreja iha esperiénsia iha área edukasaun.

"Igreja Katólika iha esperénsia di'ak kona-ba área edukasaun. Entaun, presiza partila sistema edukasaun ho igreja Katólika. Tanba, sira ho esperensia ne'ebé naruk," tenik Branco.

Tempotimor (Dili) – Ministru Transporte no Komunikasaun (MTK), José Agustinho da Silva sei loke konkursu foun ba fornesementu internet ba Governu, ho kapasita 200 Mega Bytes per Second (Mbps).  

Tuir MTK, nia parte haruka ona karta ba Primeiru Ministru husu autorizasaun para loke konkursu foun ba kompañia sira ne'ebé bele konkore no atu evita single source.

“Foin daudauk, ha'u halo fali karta ida ba ita nia sua exelénsia PM. Tanba, ida ne'e valor boot. Ita labele deside. Entaun, ha'u halo fali karta ida ba PM par husu autorizasaun, para ita halo tenderizasaun foun ba kompañia sira ne'ebé mak bele konkore,” MTK esplika ba tempotimor.com via telefone, Kinta (12/09/19).

Maski nune'e, nia espera valor la hanesan. Nia dehan, tenke diferensia ho ida agora ne'e. “Valor bele tuun, depois ninia likidu ne'e bele aumenta, para bele ajuda ajénsia Governu sira-nia servisu,” MTK informa.

Hatán ba perguntas kona-ba tempu ne'ebé limitadu, tanba Outubru tinan ida ne'e, kontratu ho kompañia GlobalNet hotu ona, MTK dehan, kona-ba ba buat ne'e presiza autorizasaun husi Primeiru Ministru. Tanba, orsamentu ba ida ne'e boot. “Sei nia valor la boot, ministru bele hola dezisaun,” MTK esplika. 

Tuir fontes Tempotimor.com iha Palásiu Governu, iha hanoin balun Governu atu halo single source ba fornesementu internet 200 MBPS ba Kompañia Telkomcel Indonézia, maibé Ministru José Agustinho da Silva dehan valor osan boot, nune'e presiza loke tender para kompañia sira bele konkore.

Tempotimor (Dili) – Presidente Partidu Sosialista Timor (PST), Avelino Coelho sujere ba estadu no Governu Timor-Leste, atu iha polítika ida prepara asesór nasionál sira. Atu nune'e, iha tinan 10 tan labele dependente maka'as ba asesór internasionál sira.

"Hau hanoin tenke iha polítika ida husi estadu. Asesór husi liur mai servisu hamutuk ho timoroan para timoroan mós bele familiariza nia pratikas no profisaun, hodi nune'e bele dezenvolve. Para depois ba tinan 5 no 10 mai, ita la depende ona ba asesoria internasionais," dehan Avelino iha Centro Convenções Dili (CCD), Sexta (08/11/19).

Nia esplika, atu atinje ida ne'e bele. Maibé, ne'e presiza polítika do estadu. Polítika sira ne'e mai husi partidu ne'ebé povu fó fiar ba ukun. Se depende ba partidu ida ba partidu ida seluk, polítika bele la hanesan.

Relasiona ho ezistensia asesór internasionál hirak ne'e, tuir Avelino, defende mós ba meteria. Tanbá iha materia balun, TL presiza apoiu asesoria hanesan iha kestaun legislasaun komplementares balun, ne'ebé iha interkambiu ho nasaun nia relasionamentu ho komunidade internasionál. Hanesan konvensoens internasionál, sei presiza tulun husi asesoria internasionál.

"Iha materia balun ke asesór internasionál mós la komprende. Ezemplu, hanesan konseitu polítika  desenvolvimentu ita nia rai nian. Bele diferente. Governu presiza equilibru situasaun rua ne'e, iha materia balun karik sei depende ba asesoria internasionál no iha materia balun estadu presiza enkoraja partisipasaun asesoria nasionál. Tanba, Timor ema formandus barak ona," nia dehan.

Maske nune'e Presidente Sosialista ne'e mos konsidera katak laiha timoroan ida, hatene liu malae. No laiha malae ida mak hatene liu timoroan.

“Tenke komplementa malu. Tanba, atu halo desenvolvimentu polítika agrikultura no legislasaun ne'ebé liga ho agrikultura ne'e, timoroan iha liu aptidaun. Tanba koñese realidade sosiu-kulturál  ne'ebé asesor liur la koñese. Iha área ne'ebé ligasaun ho konvensoens internasionais, bele karik ou bele mós ita sedauk iha koñesimentu ne'ebé kle'an, ho nune'e ita presiza mós aprende husi kolega sira husi rai seluk,” nia esplika.

Tempotimor (Dili) – Prezidente Parlamentu Nasionál Arão Noe de Jesus Amaral lamenta ho akontesimentu ahi mate durante oras haat nia laran iha Aeroportu Internasional Nicolau Lobato, Komoro, iha Sabadu (16/11).

Prezidente PN ne’e lamenta tanba ahi mate iha meiudia bainhira aviaun sira atu tuun iha aeroportu Komoro.

"Ha'u haree ida ne'e grave, tanba Aeroportu Internasional Nicolau Lobato mak odamatan ba sirkulasaun ema nian, depois ita hatene katak aviaun sempre mai iha oras meudia nian, depois ahi mate loos iha oras meudia nian," dehan Arão iha PN, Segunda (18/11/19).

Tuir Prezidente PN ne’e, loloos problema ne’e labele akontese iha Aeroportu Komoro tanba sistema elestrisidade iha ona.

Arão dehan, presiza tau atensaun maka’as ba fatin sira hanesan Aeropotu, portu no postu sira iha fronteira, tanba husi fatin sira ne'e mak bele detekta ema-nia dokumentus no sasan sira ne'ebé tama no sai, liu-liu kona-ba droga.

"Tuir loloos labele akontese, tanba ita iha ona sistema eletrisidade ne'ebé estabelese tiha ona, depois iha aeroportu mós prepara rezerva par iha koneksaun, kuandu ida mate ida fali lakan kedas, tanba fatin sira hanesan ne'e presiza tau atensaun maka'as, hanesan aeroportu, portu sira inklui mós fronteira sira," dehan Arão.

Tan ne’e, Prezidente PN ne’e husu ba parte kompetente sira atu aranza jeradór balun hodi sai rezerva.

“Ho akontesimentu ne'e PN lamenta tebes, tanba ne'e ha'u husu ba ministru relevante no orgaun sira iha kraik, liu-liu funsionamentu iha aeroportu, presiza tau atensaun. Se bele karik aranza jeradór balun para rezerva," dehan nia.

Entretantu, hafoin kazu ahi mate iha aeroportu ne’e akontese no balun públika iha media sosial Facebook, mosu lamentasaun no kritika oioin husi públiku. Balun husu ba lideransa ministériu kompetente atu rezigna an tanba konsidera laiha kapasidade no inkompetente.

Tempotimor (Díli) – Lixu ne'ebé soe naklekar de'it iha área merkadu Taibessi, fó impaktu ba negosiante sira ne'ebé hela iha área merkadu ne'e nia saúde.

Negosiante Apolinario Castro Baptista hatete, foer ne'ebé soe namkari iha área merkadu ne'e to'o dodok, iis no ular.

"Foer hanesan ne'e fó impaktu boot ba ami iha ne'e. Halo ami atu han mós ladi'ak, tanba foer ne'ebé soe arbiru to'o dodok, iis no sai ular,” tenik Apolinario, Sabadu (07/09/19) iha merkadu Taibessi.

Kona-ba oráriu parte saneamentu raut lixu hirak ne'e, tuir Apolonario semana ida dala ida. Nia dehan, bainhira parte saneamentu la ba raut fo'er, negosiante sira mak raut rasik foer ne'ebé dodok ona ne'e.

"Sente ladún di'ak. Tanba foer iha ne'e bainhira nakonu no iis ona, ami rasik suru hodi ba soe. Sujere mós ba ministériu relevante tenke tau atensaun hodi haree servisu saneamentu nian,” Apolonariu husu.

Alende ne'e, negosiante seluk Antonio Gonçalves hatete sira mós preokupa ho sanitasaun báziku iha merkadu ne'e, hanesan hariis fatin. Tuir Apolonariu, hariis fatin ne'ebé iha la favorese.

"Hariis fatin ida agora ne'e, ema barak mak uza hodi hariis no fase roupa. Balun odamatan laiha ona. Bainhira ema barak, tenke hein malu tanba odamatan laiha," Antonio Gonçalves dehan.

Tuir Antonio, hariis fatin ne'ebé negosiante sira utiliza ne'e selu. Maski ho nia presu la hanesan, maibe balun odamatan kontinua aat.

"Hariis fatin ne'e selu, bainhira ami uza hodi hariis no fase ropa. Hariis dala ida, selu 25 centavus, fase roupa 50 centavos. Hariis fatin refere, sempre loke ba negosiante hotu iha merkadu ne'e. Maibé, too 12 oras kalan taka. Tanba sekuriti sira uza. Entaun dadeer mak bele loke fali," Antonio haktuir. 

Rekoñese 

Iha fatin seluk, Diretor Saneamentu Munisípiu Díli, Domingos dos Santos Soriano rekoñese kona-ba servisu saneamentu nian iha públiku.

“Lixu ne'e, ami bele esforsu oinsá mós lixu iha hela de'it. Maibé, esforsu Governu nian ne'ebé iha. Ami depende hotu de'it ba komunidade. Tanba ne'e, bainhira ita nia komunidade iha konsiensia aas, lixu mós sei menus," Domingos afirma.

Diretór ne'e mós rejeita kona-ba negosiante sira nia deklarasaun katak, semana ida parte saneamentu Munisípiu Díli, raut foer dala ida iha Merkadu Taibessi. Tuir Domoingos, ida ne'e laloos.

“Tanba, kada loron kareta saneamentu nian sempre ba raut fo'er. Maibé, konsiensia negosiantes iha área ne'ebá nian mak menus,” Domingos haktuir.

Tempotimor (Dili) – Deputada Maria Angelica Rangel husi Komisaun C Parlamentu Nasionál hatete, nia sei la aprova livru 2 husi aprezentasaun OJE 2020, tanba la reflete ho planu no programa.

"Ami sei la aprova livru 2, tanba la reflete ho programa no planu," dehan deputada Maria Angelica Rangel iha ninia intervensaun ba aprezentasaun OJE 2020 loron daruak nian iha Parlamentu Nasionál, Tersa (03/12/19).

Nia relata, iha Komisaun C vota kontra iha 4. Tanba, ho pozisaun katak, kuandu inskonstitusionál ba legalidade sira ne'e, tenke haruka filafali ba governu atu hadi'a.

Angelica afirma, kuandu OJE 2020 la kumpri rekezitus formais, presiza para governu hadi'a tiha lai.

Tempotimor (Dili) – Koordenadora grupu to'os na'in Haburas Moris (KHM) Rince Nipu, husu ba Governu atu hadi'a sistema pagamentu ba to'os na'in sira. Saláriu ne'ebé simu tarde, hamosu konfuzaun iha familia laran. Inklui grupu.

"Bainhira pagamentu tarde, mosu violénsia iha to'os na'in sira nia familia no sira nia grupu. Tanba, sira simu osan tarde, iha sira nia grupu hirus malu. Sira duun malu no lori malu ba Governu. Gasta ona tempu tan atu hetan de'it pagamentu ne'e," dehan Rince Nipu iha salaun João Paulo II Comoro, Sesta (22/11/19).

Nia dehan, tan pagamentu tarde, to'os na'in lakon sira-nia konfiansa ba Governu. Tanba Governu la haree ba nesesidade to'os na'in sira nian.

"Lia fuan lakon konfiansa mosu, tanba pagamentu tarde. Tanba to'os na'in bainhira halo to'os no koleita presiza osan. Bainhira sira halo to'os ne'e, selu ema hodi halo to'os. Maibé, bainhira koleita hotu ona, sira simu osan tarde. Ida ne'e mak halo sira lakon fiar no triste," Rince tenik.

Alende ne'e, turi Rince problema seluk ne'ebé sira hasoru mak menus transporte.

"Bainhira produtu sira ne'ebé ami prodús ne'e koleita ona, ami labele lori to'o iha merkadu nasionál, tanba transporte laiha. Tanba, husi Maliana mai Dili, ret ida pelumenus $250 to'o $300 kada kareta," dehan Rince.

Tempotimor (Dili) – Semana oin, 28 Novembru 2019, Timor-Leste sei selebra tan loron boot no importante ida. Loron Proklamasaun Independensia Unilaterál, ba tinan 44.

La hanesan ho selebrasaun loron boot seluk, ba tinan ida ne'e, selebrasaun loron 28 Novembru, la hetan partsipasaun husi komunidade internasionál.

"Ate agora, tuir ultima reuniaun orgaun soberanu haat, laiha konvite ba liur no laiha pedidu ruma husi liur atu mai partisipa," dehan Vise Ministru Administrasaun Estatál, Abilio José Caetano iha Palásiu Governu hafoin halo enkontru ho Primeiru Ministru (PM), Tersa (19/11/19).

Enkontru durante minutu 10 nia laran, akompaña husi Diretór Centro Nasionál Chega (CNC), Hugo Fernandes, Abilio informa diretamente ba PM katak serimonia 28 Novembru 2019, sei hala'o iha Palásiu Governu nia oin.

"Tantu, ida ne'e de'it ami hato'o para Primeiru Ministru bele akompaña atividade preparasaun ne'ebé sei realiza iha Palasiu Governu ho razaun tanba tenke tuir istória Proklamasaun nian," Abilio tenik.

Tuir Abilio, Presidente Repúblika rasik mak sei sai hanesan inspetor da serimónia ne'e. Ne'ebé atividade ba tinan ida ne'e, Abilio dehan, hahú ho misa agradesimentu no isar bandeira. Iha mós  feira ne'ebé sei halo husi Ministeriu Komérsiu no Indústria durante loron 3-4 iha Centro Convenções Dili.

Tempotimor (Dili) – Maski la temi kuantia, Ministra Edukasaun Juventude no Desportu (MEJD), Dulce de Jesus Soares rekoñese númeru eskola ne'ebé infraestrutura aat iha Timor-Leste aumenta.

"Hau rekoñese, iha TL eskola barak mak ninia infraestrutura sei iha problema nia laran. Maibé, ita mós hare'e katak iha tinan oin mai Governu kontinua tau nafatin esforsu, atu hadi'a eskola hirak ne'e," dehan MEJD iha Timor Plaza, Tersa (19/11/19) hafoin halo lansamentu ba Manual Inspesaun Eskolar nian.

Nia dehan, la'ós problema infraestrutura de'it. Maibé, estudante balun laiha kadeira hodi tuir aprendizajen. Ho nune'e, MEJD konsidera ida ne'e hanesan dezafiu ida ne'ebé tenke tau atensaun.

"Ida ne'e mak dezafiu iha edukasaun no dalan ida de'it mak Governu tau osan. MEJD iha planu di'ak  no iha tinan mai bele responde," nia dehan.

Inspetor Eskolar

Iha fatin hanesan, MEJD mós konsidera difikuldade ne'ebé inspetor eskolar sira enfrenta iha baze, nu'udar frakeza husi ministeriu nian.

"Hau labele ezise deit husi imi. Maibé, tenke prepara mós kondisaun hanesan motor no kombustivel.  Tanba distansia ne'ebé dook atu kobre ba área kobertura sira," Dulce dehan.

MEJD ne'e mós rekoñese, iha inspetor balun mak halo ona servisu liu tiha fali kapasidade ne'ebé nia iha, no dalaruma kobre liu númeru estandarte.

“Ho kondisaun eskola ne'ebé dook, kada inspetor tenta hodi halo rasik nia oráriu ba loron inspeksaun. Ho nune'e, maske dook maibé bele kobre hotu,” Dulce akresenta.

Nia dehan, iha futuru inspetor eskolar ida sei reponsabiliza ba eskola 20. Maibé, oras ne'e daudauk MEJD iha de'it inspetor hamutuk 91. “Ho nune'e iha tinan 2020 sei halo rekrutamentu ba inspetor jerál  hamutuk 120 ho nune'e bele hatán ba problema ne'ebé iha.”

Tempotimor (Dili) – Ministra Defeza (MD) Austrália, Senadora Hon Linda Reynolds CSC kompromete, sei hametin kooperasaun bilaterál entre nasaun rua iha área marítima, ambiente no manutensaun ba paz.

Komunikadu imprensa ne’ebé tempotimor.com asesu iha portál Departamentu Ministériu Defeza Australia nian hatete, Ministra Defeza Australiana ne’e sei vizita Timor-Leste entre loron 19 -21 fulan Setembru tinan ida ne’e.    

“Hau sei halo viajen ba Dili, entre 19 e 21 Setembru hodi partisipa iha eventu sira hodi rekoñese aniversáriu ba daruanuluk lansamentu Forsa Internasionál ba Timor-Leste (INTERFET),” hateten Ministra Linda iha komunikadu ne’e.

Nia konsidera, aniversáriu ne’e hanesan oportunidade hodi fó onra ba papél INTERFET nian, hodi reestabelese paz no fasilita Timor-Leste, hodi dezenvolve hanesan nasaun ne’ebé independente, soberanu no sustentavel ekonomikamente.

Privilejiu hodi reuniaun ho Governu Timor-Leste, ho povu Timor-Leste no ho veteranu INTERFET nian, hodi komemora lansamentu istóriku ne’e.

“Ha’u espera koñese veteranu sira no membru forsa defesa Australia nian ne'ebé uluk serbisu iha INTERFET ho Ministru Assuntos Veteranus no Pesoál Defesa, Darren Chester, iha resepsaun ida iha ró HMAS Choules, ne'ebé hela iha Dili, hodi marka komemorasaun ida ne’e,” Ministra ne'e hateten.

Nia dehan, ninia visita dahuluk iha Timor-Leste hanesan Ministra Defesa. Nia sei fornese mós oportunidade hodi hala'o diskusaun formál ho Governu Timor-Leste kona-ba oinsá atu bele haluan kooperasaun iha ambiente marítima, formasaun no operasaun manutensaun paz.

Ministra ne'e mós sei visita Base Naval iha Hera. Fatin ne’ebé sei renova liuhosi pakote seguransa marítima ne’ebé Primeiru Ministru Austrália, Scott Morrison anunsia ona hodi asegura katak fatin refere prontu hodi simu ró patrulhu tipo Guardian Class rua ne'ebé Australia sei entrega iha 2023.

“Ha’u nia visita mós ho konklusaun Ezersisiu Hari’i Hamutuk – ezersisiu engenharia no kapasidade ne'ebé akontese durante fulan ida, tinan-tinan,” nia esplika.

Tinan ida nee engenheiro kombate nian husi Austrália no Timor-Leste serbisu hamutuk hodi hasa’e sira nia kapasidade iha área konstrusaun, dezenvolvimentu infraestruktura no manutensaun ekipamentu, liuhosi projetu iha Kapitál Timor-Leste.

Hari’i Hamutuk, nia signifikadu iha Tetun emblematiku ho futuru kooperasaun defesa Austrália ho Timor-Leste, ho foku iha kooperasaun prátika hodi suporta Timor-Leste nia kapasidade defesa.

Page 1 of 27

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com