Ministra Odete deklara kestaun ne’e relasiona ho preokupasaun husi deputada Bankada FRETILÍN Maria Angelica bazeia ba relatoriu kona-ba prevensaun Covid-19 ne’ebé hatete katak durante ne’e ventiladór iha Vera Kruz ida de’it, maske PN aprova orsamentu boot ba prevensaun Covid-19, hamutuk millaun $220.
"Ohin aprezenta dehan 'ita iha ventilador ida de'it, ami hakfodak depois ida ne'e mós apoiu husi Xina, tanba sa? Ami aprova tiha osan, ventilador ida de'it, depois apoiu husi Xina," Deputada Angelica kestiona.
Hatan ba kestaun ne’e, Minisrra Odete dehan, governu halo kontratu ho UNDT, Korea Sul, no UNICEF hodi sosa aimoruk no material Covid-19, inklui ventiladór lima.
Maibé, nia esplika, tanba sasan barak, nune’e tenke fahe ba faze rua, no iha faze dahuluk, sira haruka uluk aimoruk, no sasan sira seluk, inklui ventiladór sei haruka iha faze daruak.
Nia informa mós katak, ventiladór la'os iha Sentru Saúde Vera Kruz de'it, maibé iha Hospital Nasional Guido Valadares (HNGV) mós iha 8.
"Ventidor iha Hospital Nasional Guido Valadares iha 8 ne'ebé iha sala operasaun 3 no iha ICU 5, maibé ventilator sira ne'e la'os uza ba kazu Covid-19, ventidor ba kazu Covid-19 mak iha Vera Kruz hamutuk 5 maibé espera katak laiha kazu atu halo manobru ba ventidor," katak nia.