Família matebian, Maria dos Santos Araujo, haktuir kronolojia, vítima husi uma ba hariis iha fatin besimanulu atu ba eskola, maibé to'o iha dalan derepente mosu anin boot, kauza ai-hun samtuku tohar no vítima tenta halai atu salva aan, maibé labele, tanba halai la biban, nune'e ai-hun refere hanehan vítima rezulta mate fatin.

"Nia ho nia kolega sira ba hariis, entaun nia kolega sira seluk hariis mai uluk ona, nia mak ikus, derepente ai tun mai nia halai mós labiban, tanba nia idade foin mak tinan-5, aihun ne'e hanehan nia, nia katutak sai hotu", nia haktuir via telefone, Sesta (10/02).

Enkuantu vítima naran, Jelita Rosario das Neves, eskola iha ensiñu báziku sentral Lekisi, Suku Poetete, Postu Ermera, foin primeiru anu.

Parte família sente triste, tanba lakon ona feto mesak, husik maun na'in-2 hamutuk família Aman Alarico Rosario das Neves no Inan Juliana Salsinha iha mundu.

"Ami sente triste tebes, tanba nia feto mesak, maibé atu halo oinsa, ne'e maromak nia planu", nia espresa.

Xefe Aldeia Leokisi, Ananias Aleso Martins, afirma, iha tuku 07:00 parte dader vítima husi uma ba hariis atu ba eskola, maibé hafoin fila husi fatin hariis, mosu anin boot, rezulta ai-samtuku tohar hanehan vítima, to'o mate fatin.

"Iha ne'e, agora udan anin makas, tanba ne'e ai-hun ne'e tohar", nia dehan

Hanesan parte autoridade, sei koopera ho Autoridade Protesaun Sivil, Munisípiu Ermera, hodi halo aprosimasaun ba komunidade hotu, nune'e bele tesi ai-hun boot ne'ebé besik uma no dalan ninin, tanba fo risku ba ema nia vida.

Husi akontesementu ne'e mós, rezulta uma ida hetan estragus, tanba ai-hun samtuku hanehan.

"Akontesimentu ne'e mós ai-hun ne'e kona ema nia uma ida, hetan estragus, maibé la rezulta ema ruma kanek, só labarik ne'e de'it mak mate", nia hakotu (*)