Responsavél Programa NSD, Moras la-hada'et Baukau, Cristina Esperansa Gusmão, esplika, dadus provizóriu ba infeksaun matan mean iha Munisípiu Baukau, ne'ebé rekolla ona husi Sentru Saúde sira, hanesan, Sentru Saúde Reamare, Uailili, Venilale, Ossokeli, Vemase, Laga no Baguia, hamutuk 108, kompostu husi labarik mane na'in-18, feto 29, ema boot, mane 32 feto 25, ema indultu mane 1 no feto 3.

"Totál matan mean ne'ebé provizóriu rejista iha Munisípiu idade enjerál hamutuk mane 51 feto 57, maibé dala ruma sei sa'e tán, tanba dadus seidauk tama hotu", dehan nia iha kna'ar fatin vila antiga, kuarta (01/03)

Enkuantu infeksaun matan mean ne'e, kauza husi baktéria, ne'ebé fó impaktu ba matan laran katar, matan been suli, matan bubu, matan teen barak, no fasil liu hada'et tutan ba ema ne'ebé besik.

Nune'e, tenke halo prevensaun hanesan, fase liman beibeik ho sabaun, evita uza tolla kose ba matan, labele ka'er ba matan laran, karik liman seidauk fase ho sabaun, evita halo kontaktu besik, ba ema ne'ebé afeitadu infeksaun matan mean.

"Pesoal saúde sira hahú ona halo promosaun, atravez husi kampaña vasina fó hanoin ba komunidade, wainhira hetan infeksaun matan mean, tenke lori lalais ba fasilidade saúde ne'ebé besik, halo tratamentu", nia akresenta

Husu komunidade hotu, wainhira hetan infeksaun matan mean, lalika depende uza ai-moruk tradisionál, tanba bele halo prosesu naruk ne'ebé bele infeksaun grave liután ba matan laran, maibé hakbesik aan ba fasilidade saúde hodi halo tratamentu.

Entretantu Munisípiu Baukau nia área luan 1,504.2 km2 kompostu husi Postu Administrativu-6, Suku-59, no totál populasaun hamutuk 126,562, maibé iha postu saúde 30, sentru saúde 9, ho totál pesoal saúde hamutuk na'in-354. (*)