Tanba inisiu tinan 2023 fulan-janeiru, klínika veteranu Baukau konsege rejista pasiente veteranu no komunidade bai-bain hamutuk rihun 1.300-resin, pasiente veteranu hamutuk na'in-800, inklui komunidade bai-bain na'in-500.
Enkuantu pasiente hirak ne'e, husi Munisípiu Ainaru, Baukau, Bobonaru, Ermera, Dili, Lautém, Manatutu inklui Vikeke.
"Vizitante ba fulan-janeiru ne'e liu tiha fali kapasidade ita nia pesoál saúde sira, veteranus 800 komunidade bai-bain 500, ne'ebé forsa kapasidade ita nia rekursu kuaze vizitante ne'e liu tiha ita nia pesoál saúde sira iha ne'e", dehan Koordenadór Klínika Veteranu David Alex "Daitula", Leonel Guterres, iha kna'ar fatin Reamare vila antiga Baukau, Kinta (09/02).
Tanba pesoal ne'ebé dadaun servisu iha klínika veteranus hodi fó atendementu ba pasiente veteranu no komunidade bai-bain, hamutuk na'in-12.
Maske nune'e, pesoál saúde sira la lakon vontade kontinua atende pasiente sira veteranu no komunidade bai-bain, ne'ebé presiza tratamentu, tanba kumpre misaun no obrigasaun servisu saúde nian.
"Kondisaun ida ne'e ita labele dehan todan liu, maibé ita tenke hatene sira (veteranus) rai ne'e nia na'in, ita bele atede buat ne'ebé ita bele halo durante sira moris", nia subliña
Númeru pasiente ne'ebé durante fula-janeiru tinan 2023 hala'o tratamentu, kompostu husi moras, tensaun alta hamutuk 180, rematizmu 113, pulmaun-króniku 196, Tiroid 40, problema nehan 185, diabetes 15, gastrisis 26, Ispa 175, prostata no matan.
Husi tipu moras sira ne'e, afeita liubá kondisaun veteranus sira mak, kazu prostata, ne'ebé halo operasaun boot ba veteranu na'in-ida iha Ospítal Referal Eduardo Ximenes (HoREX-sigla portugés) Baukau, alende mós operasaun ki'ik hamutuk 14, no halo observasaun duranre oras 2-4 ba kazu tensaun altu iha klínika hamutuk 114.
Nune'e mós iha fulan-janeiru, pesoál sira halo observasaun direita ba kondisaun veteranus na'in-4, kompostu husi mane-ida no feto na'in-3, tanba kondisaun la-permite hodi hakat rasik ba klínika hodi hetan tratamentu.
Entretantu pesoal na'in-12 ne'ebé iha klínila veteranu Baukau, kompostu husi pesoál permamente na'in-8, médiku kontratadu na'in-2, inklui voluntáriu na'in-2. (*)
