"AMTL depora no kondena hahalok agresaun fízika no Insultus husi individu ida ne'ebé pretende órgaun Estadu responsável ba ordem no seguransa públiku hasoru médika na'in rua ne'ebé hala'o hela kna’ar iha emergensia HNGV iha oras 03:10 madrugada loron 24/12/2022, Independentemente, husi se mak iha razaun no se mak la iha razaun violensia ka agresaun fízika no Insultus la'ós dalan atu rezolve diferensas ka deskontetamentu ruma ne'ebé mak mosu iha servisu públiku sira  no labele hetan fatin Estadu de direitu demokrátika Timor-Leste ne'ebé povu mak konkista liuhusi luta naruk. Satan hahalok agresaun fízika no Insultus sira ne'e mai fali husi individu ne'ebé tuir loloos tenke mantein no garante no seguransa ba ordem Públiku ida", dehan Portavoz AMTL, Rui Maria de Araújo iha HNGV, kuarta (28/12).

AMTL ejije ba Hospital Nasional Guidu Valadares (HNGV), no Ministériu Saúde nu'udar entidade patronál husi médika na'in rua ne'ebé sai vítima ba agresaun fízika no Insultus bainhira sira na'in rua hala'o hela knaar.

HNGV tenke aprenzenta keixa ba orgaun tutela husi individu ne'ebé pratika agresaun fízika no Insultus iha fatin públiku prestassun servisu hasoru servidor públiku seluk iha momentu servidor públiku sira ne'e rasik hala'o hela kna’ar nu'udar funsionáriu MS nian.

Nune'e, aprezenta mós keixa krime ba Ministériu Públiku kona-ba individu ne'ebé prátika agresaun fízika no Insultus hasoru médika na'in rua bainhira sira na'in rua hala'o hela knaar Públiku iha servisu emergensia iha HNGV.

AMTL mós husu ba HNGV atu hadi’a jestaun saúde iha Hospital ne'e rasik atu eleva nafatin prestasaun servísu médiku ho kualidade ba sidadaun Timoroan hotu ne'ebé hala'o tratamentu saúde.

"Hadi’a liu tan jestaun servísu hospitaláriu iha HNGV hodi bele hamosu kondisaun servísu ne'ebé kombussívu ba prestasaun servísu médiku ho kualidade", dehan nia.

Alende ne'e, mós hamosu kondisaun seguransa ne'ebé di'ak liu tan ba funsionáriu sira ne'ebé hala'o kna’ar iha fatin sira ho risku hanesan servísu emergensia HNGV.

AMTL mós lamenta ho reasaun negativa no Insultus husi públiku balun hasoru ofisiál médika husi maioritariamente individu anónimu iha média sosial hafoin insidente relasaun akontese, liberdade espresaun la signifika atu Insulta ema seluk iha estadu direitu demokrátiku hanesan Timor-Leste

AMTL apela ba médiku sira hotu iha Timor-Leste nia laran tomak atu servisu nafatin ho vokasaun no dedikasaun tomak tuir Juramentu ne'ebé ida-idak halo bainhira sira kna’ar nu'udar médiku no tuir nafatin funsaun ne'ebé atribui husi entidade patronal no mós tuir nafatin protokolu prestasaun servísu ne'ebé iha maske ema balun ne'ebé kontente ho atensaun ne'ebé iha. (*)