"Husi Maiu to'o Jullu, kazu dengue komesa sa'e fali, tanba iha Maiu hamutuk 43, Juñu laiha, iha Jullu semana rua resin rejista 13, nune’e hamutuk 56 pozitivu hotu," dehan Diretór Servisu Saúde Munísipiu Baukau, Domingos Reinaldo da Costa Guterres iha kna'ar fatin Reamare Vila Antiga, tersa (12/07).
Númeru pasente ne'e, kompostu husi Óspital Rejionál Eduardo Ximenes (HoREX-sigla portugés) Baukau, sentru saúde Tirilolo, postu saúde Bukoli, postu saúde Ualili, Venilale, Vemase no Kelikai.
Kazu dengue kauza husi susuk tata, tanba tempu udan bee nalihun iha vazu ai-funan, pineu ne’ebé haki’ak susuk sai barak liután.
"Husi númeru ne'e, balun rekupera ona eh balun sei baixa hela iha HoREX no pasiente ne'e, maioria labarik ki'ik," nia afirma
Nune’e, Servisu Saúde Baukau kontinua siensibiliza informasaun ba komunidade atu hamoos fatin uma ninin hodi garante ambiente moos.
Alende ne’e, pesoál saúde sira nafatin la'o tama sai uma hodi distribui aimoruk Abate ba komunidade sira atu prevene.
"Kona-ba fogin, ita haree fali ba fatin ne’ebé afeitadu hafoin rega aimoruk atu bele evitá susuk nia moris," nia akresenta. (*)