“Ha’u hanoin señor Ministru karik bele tau atensaun ba atendimentu  pesoál saude sira tanba ha’u iha informasaun ita-nia señora ida konsege lakon nia vida. Ne’e atendimentu sira husi pesoál saúde sira liliu iha momentu señora ne’e atu ba partu tanba pesoál saúde sira obriga hakarak halo bebé ne’e moris lalais ha’u la hatene termos médiku ne’e oinsá mais balun lori liman dudu iha kabun no hirus matan sira ne’e tanba hakarak atu bebé ne’e moris lalais sira tenke halo ema ne’e lakon nia forsa para depois ema ne’e lakon nia vida”, dehan Vise Xefe Bankada CNRT, Deputadu Patrocinio Fernandes iha Plenária Parlamentu Nasionál, tersa (12/07).

Tanba situasaun sira ne’e akontese dalabarak iha ospitál sira utiliza estudante sira ne’ebé ba halo prátika seidauk iha esperiénsia atu halo atendimentu ba pasiénte sira nune’e kontese ema lakon vida.

“Ita bele sente ita bele komprende karik ita-nia rekursu la to’o tanba sá mak funsionáriu kontratadu sira ne’ebé esperiénsia di’ak iha ospitál hapara hotu mais depois ita utiliza ita-nia ospitál sira ne’e dalabarak ita haree utiliza estudante sira ne’ebé ba prátika iha ne’eba la bele prátika ho ema nia di’ak”, afirma nia.
Tanba ne’e, husu ba Ministru Asuntu Parlamentar no Komunikasaun Sosiál, Francisco Jeronimo, atubele informa Ministériu relevante tau matan problema ne’ebé akontese hodi kontinua dada nafatin interese povu sira ba halo tratamentu iha ospitál.

“Ba ida-ne’e keta halo ba ospitál ne’e envez de sai esperansa ba povu la’e para sira iha problema ruma ba ospitál maibé ospitál ne’e ba povu hanesan fali antipatia tiha ou tauk tanba sira iha moras ba ospitál tanba de’it atendimentu sira ne’e”, afirma nia.

Ba problema ne’ebé mosu deputadu CNRT sente hanesan problema seriu ne’ebé presiza haree no minitériu relevante presiza fó atensaun hodi muda.

“Ha’u hanoin ida-ne]e seriu oituan tanba ami mós observa barak ona ita ba ospitál sira ne’e maioria ita-nia alin sira ne’ebé estudante ne’ebé mak ba prátika iha ne’eba mak pesoál sira dalabarak halo sira mak  atendimentu barak liu ba ida-ne’e”, katak nia. (*)