Ofisiál Programa Promosaun Edukasaun Saúde ba vasina Pfizer Munisípiu Baukau, Abrão Pinto, hatete, estudante hamutuk 19.821, kompostu husi eskola ensiñu báziku to'o ensiñu sekundáriu 198 mak atu simu vasina.
Maibé, tuir dadus husi servisu saúde Munísipiu Baukau, iha loron 11 fulan-marsu tinan-2022, to'o 01 fulan-abril tinan-2022, estudante husi eskola 123 mak simu ona vasina no 75 seidauk, tanba menus rekursu.
"Husi númeru estudante ne'e, ita fó ona vasina doze primeiru ba labarik sira hamutuk 13.945," dehan Abrão iha Uatulete, segunda (04/04).
Lansamentu vasina Pfizer, iha loron 11 fulan-marsu tinan-2022, ékipa planeia implementa uluk ba eskola ne'ebé númeru estudante barak, hanesan, eskola EBC 01 Tirilolo, EBC 03 vila nova, ensiñu sekundáriu jerál 01 Tirilolo, ensiñu sekundáriu públiku 02 vila nova no Eskola Sekundária Santo António (ESSA) Teulale Baukau ho nia filiál hotu, hafoin kobre tán, eskola seluk.
"Iha eskola sekundáriu jerál nu.01 ita hala'o vasina loron 2, ékipa hamutuk 7, maibé ita kobre loron 2, tanba estudante barak," nia afirma
Númeru estudante barak ne'ebé seidauk simu vasina, husi Postu Adminisitrativu Baukau Vila no Kelikai, enkuantu postu 4 seluk hanesan, Baguia, Laga, Venilale no Vemase, hela eskola ida ou rua.
Nune’e, ékipa sira kontinua esforsu atu bele iha fulan-abril tinan-2022 antes elesaun Prezidénsial segundu volta konklui ona vasina Pfizer doze dahuluk ba estudante sira iha Baukau.
"Doze segundu agora hamutuk 378, ba doze segundu foin mak ba EBC Tirilolo de'it, aban ita kontiua," nia dehan
Dadaun stock vasina Pfizer iha Baukau sei sufisiente no husi inisiu to'o ohin loron seidauk iha vasina viál-ida mak hetan estragus ka expire. (*)
