Matebian Francelino da Costa ne’ebé bai-bain bolu ‘Anuni’ ho idade-22 husi Aldeia Uaibitai, Suku Ossohuna, Postu Administrativu Baguia, Munisípiu Baukau.
Evaresto das Dores ne’ebé ba haree akontesimentu ne’e, haktuir, karreta Bus Luabere marka Qenton kor azul ho sapa martikula 36.204 husi diresaun Baukau Baguia baku fila pur-volta tuku 2:00 oras Timor-Leste (OTL).
Tuir kronolojia, Bus Luabere atu lori hela pasajeiru na'in-2 ba Uatukarabau no matebian la’o halimar (pasiar) tuir Bus, maibé derepente hasoru asidente iha dalan.
"Tuir informasaun, penungpan (pasajeiru) na'in-2 Uatukarabau nian ne’e kanek de'it trauma, entaun ba tiha ona, konjak super halai lakon, entaun mate ne'e, mesak toba hela de'it," dehan Evaresto iha fatin akontesementu ba www.tempotimor.com via telefone, kuarta (02/03).
Nune’e, parte Polísia Tranzitu Postu Baguia no Postu Uatukarabau iha ona fatin akontesementu hodi halo investigasaun.
Ofisiál Polísimentu Komunitáriu (OPS) Suku Ossohuna, Dominicos Varente Amaral hateten, husi akontesementu ne'e sidadaun naran Fancelino da Costa ho idade-22 lakon vida iha fatin akontesementu.
"Dadus ami entrega hotu ona ba komadante eskuadra Uatukarabau," nia hatete
To'o notisia ne'e públika, www.tempotimor.com tenta konfirma komadante seksaun tranzitu Postu Baguia ne'ebé iha hela fatin akontesementu, maibé la fó komentariu ruma, tanba razaun asidente ne'e, akontese iha área Munisípiu Vikeke nian. (*)
