"Advokasia ba ohin loron ko'alia kona-ba oinsá implementa vasina Pfizer ba estudante sira, liu-liu ba idade-12 to'o menus 18 anus, antes atu implementa presiza iha informasaun klaru Autoridade sira," dehan Koordenadór Saúde na Família, Feronimo Ornai iha Reamare, segunda (28/02).
Tuir planu, iha loron 01 fulan-marsu tinan 2022 (aban) sei kontinua hala'o advokasia iha nivél Postu, Suku no eskola sira durante semana idaa, nune'e remata bele implementa ona vasina.
"Tinan kotuk fulan-setembru, ami konsege rejistu duni, agora anu letivu foun ita presiza update foun fali, tanba estudante balun akaba ona estudu iha ensiñu báziku, balun iha ensiñu sekundáriu, entaun presiza update ulang fali," nia informa
Tanba ne'e, ékipa sira hahú rejista hikas fali kada eskola, bainhira hotu sei haruka fali tán dadus estudante ba Servisu Autonomu Medikamentus Ékipamentus Saúde (SAMES) rejionál no nasionál atu bele transfer stock vasina mai Munisípiu.
Nune'e, reprezentante Prezidente Autoridade Munisípiu (PAM) Buakau, Sekretáriu Munisípal Baukau, Simão dos Santos Marques Pinheiro husu ba responsavél eskola sira iha Munisípiu Baukau mobiliza estudante sira ho idade-12 to'o 18 atu partisipa iha vasina.
"Vasinasaun ida ne'e, importante tebes ba salva vida nian, tanba meius sira halo (advokasia) oinsá atu aseita ba partisipante iha vasinasaun," nia hatete
Dadus tinan 2021 iha Munisípiu Baukau estudante husi eskola 184 ne'ebé atu partisipa iha vasina Pfizer hamutuk 21 resin.
Entertantu, iha fulan-fevereiru tinan 2022, labarik ho tinan-12 to'o tinan-18 ne’ebé ho voluntariamentu simu uluk ona vasina Pfizer hamutuk na'in-15. (*)
