"Ami la konkorda razaun mak ne'e, ami hanoin ba sira ida ki'ik oan iha ami-nia oin ne'e, tanba ida ne'e futuru ida ke tempu naruk mai, se aban bairua mak sira boot mai rai tan jerasaun ba jerasaun, sira atu ba hela iha ne'ebé?. Ita-boot sira hatene ita ba hotu sidade ne'e buka kabun, buka moris, mais aban bairua sira tenke fila mai iha moris fatin, ne'e ami-nia rai eransa ne'e, ami la'ós hela iha rai Estadu, ne'e ami-nia rai eransa”, dehan Elsa Xavier iha iha nia Rezidénsia Lausi, Postu Administrativu Aileu Vila, Munisípiu Aileu, tersa (21/12). 

Maske Governu iha loron 21 dezembru 2021, lansa fatuk dahuluk ba konstrusaun ba projetu Sidade Universitáriu Aileu maibé família balun seidauk koopera di'ak ho Governu iha prosesu indiminizasaun inklui mós la entrega rai ba Governu.

Durante ne’e, rai ektare 16, Governu seidauk fó indiminizasaun inklui konkordansaun família ho Governu.

"Sira dehan ami ne'e simu hotu ona indiminizasaun, mais lae, ami rai ida lian 16 ektare ne'e ami seidauk simu sentavu ida e ami seidauk asina akordu ida ho Governu mós seidauk”, afirma nia.

Família afeita ba projetu ne'e mós iha kontribuisaun mak hatudu rai ektare 63 iha aibubur laran maibé Governu hakarak mak fatin ida ne'ebé iha sentrál tanba iha besik atu asesu estrada no fasil atu transporte tama no seluk.

"Ami husi inisiu kedas to'o agora ami ko'alia tiha ona, ami ho prinsípiu, ami to'o iha ne'ebé de'it rai ne'e ami sei la oferese, tanba ami rai laiha ona rai mak ne'e de'it, ami oferese rai gratuita ba Estadu desde inisiu ektare 60 sa'e ba leten, ami oferese gratuita, sen Estadu gasta sentavu ida”, esplika nia.

Tanba fatin dadaun atu hari’i sidade Universitáriu Aileu ne'e rai bokur ne'ebé mak komunidade hela iha ne'ebá hodi kuda ai-horis no seluk tan ne'ebé mak responde ba komunidade afeitadu nia moris loroloron.

Diretór Jerál Administrasaun Finansas Ministru Ensinu Superior Siensia no Kultura (MESSK), Hernâni Viterbo da Costa Soares hatete, sira halo koordenasaun ho komunidade ikus mai hetan aseitasaun finál iha komunidade sira.

"Ministériu Ensinu Superior Siénsia no Kultura (MESSK) nu'udar na’in ba projetu hahú iha fulan-outubro 2019 halo koordenasaun Ministériu relevante halo enkontru alargada ne'ebé hetan partisipasaun husi komunidade lokál sosiedade Sivíl, sira iha soru mutu koordenasaun koñese suku komún atu hari’i sidade Universitáriu Aileu ba dala-sanulu-resin-tolu (13), to'o iha faze ikus aseitsaun final husi komunidade sira”, esplika nia.

Husi konsultasaun13 ne'e realiza soru mutu alargada tolu (3) no hala'o sorumutu ho komunidade ho dimensaun ki'ik atubele hetan konsensu finál no aseitasaun final hamutuk dala 10.

Totál populasaun hamutuk 44 sira ne'ebé afeita atu halo indiminizasaun hamutuk uma-kain 38, no la aseita hamutuk 6, totál komunidade iha rai hamutuk 103, aseita hamutuk 75, no la aseita 9 no laiha konfirmasaun finál 19.

"Totál komunidade ne'ebé iha ai-horis hamutuk família 63, aseita hamutuk 45, la aseita hamutuk 5 no laiha konfirmasaun hamutuk 9”, informa nia. 

Totál indiminizasaun ba faze dahuluk nian hamutuk rai no ai-horis no uma hamutuk millaun US$1.1054.990.

Maibé ba família afetadu ne'ebé la aseita Governu sei kontinua rezerva osan atu efeti ba indiminizasaun. (*)