"Tuir Monitorizasaun ne'ebé ami iha depois de ami rekolla kona-ba utilizador viatura maioria hothotu iha kargu Diretór Jerál, Xefe Departamentu sira e mós Kargu Xefia”, dehan Xefe Unidade Informasaun no Seguransa-Komisaun Anti Korrupsaun (KAK), Euclides Vidal Madeira, iha Salaun CFP, kinta (11/11).
Patrimóniu Estadu ne'ebé Diretór no Xefe sira uza Polísia Nasionál Timor-Leste liuhusi unidade Tránzitu prende iha tempu Finadu liuba hamutuk 10 ne'ebé mai husi Ministériu lima (5).
"Husi viaturas 10 ne'ebé mak ami deteta iha Ministériu lubuk ida mak hanesan, Ministériu Agrikultura e Peskas (MAP) Ministériu Interiór (MI) Sekretária Estadu Igualidade (SEI) Ministériu da Edukasaun Juventude no Desportu (MEJD) no Ministériu Finansas (MF) rasik”, informa nia.
Maibé iha viaturas lima (5) mak hetan autorizasaun husi nia superior sira maibé iha lima (5) laiha karta autorizassun husi nia superior sira.
Nune'e KAK entrega ona relatóriu inspesaun durante loron Finadu husi Ekipa integradu ba Komisaun Funsaun Públika hodi prosesa tuir lei ne'ebé vigór ba iregularidade utiliza viaturas patrimóniu eEtadu nian.
Alende ne'e Komisáriu Komisaun Funsaun Públika (KFP) Assuntu Disiplinár, Fausto Freitas da Silva hatete, sei aplika tuir pesu ka todan husi iregularidade sira ne'ebé komete.
"Sira ne'ebé iregularidade ne'e tuir fatór mak determina ne'e husi investigasaun mak foin termina katak nia sala ne'e halo nusá?. Hanesan ohin dehan iha lima ne'ebé iha autirizasaun no lima la iha autirizasaun”, dehan nia.
Ba sira ne'ebé laiha autorizasaun sei hein pena saida mak atu fó ba sira ne'ebé kontra sira ne'e.
"Ba sira ne'ebé mak iregularidade ne'e bele fo sansaun, bele fo multa, no kuandu todan bele demisaun ne'e tuir lei”, hatete nia.
Tanba iha lei nu. 8/2003 iha tempu loron Sesta Feira funsionáriu utiliza kareta to'o de'it tuku hitu (07:00 otl) no Sábadu-Domingu la utiliza karreta Estadu sira.
Iha tinan 2021, Governu Timor-Leste instala Ekipa Fiskalizasaun Konjunta (EFK) kompostu husi Polísia Nasional Timor Leste (PNTL), Diresaun Nasionál Transportes no Terrestres (DNTT), Ministériu Finansas (Patrimonio Estado), Komisaun Funsaun Públika (KFP) no Komisaun Anti Korrupsaun (KAK) sira mak Servidor Estadu ka Funsionáriu Públiku uza transporte plat G durante festeja loron finadu tinan 2021 nian. (*)