“Hanesan ita-boot sira haree katak, bainhira iha iregularidade konserteza, instituisaun sira hanesan autoridade polisiál nomós autoridade judisiál sei halo serbisu atu halo medida”, dehan Komisáriu KAK, Sergio de Jesus Fernandes da Costa Hornai, iha nia kna’ar fatin, Farol, kinta (05/08).

Tanba justisa vale no prevalese ba ema hothotu, entaun sira sei halo apura ba kazu sira ne'ebé atubele haree loos ka laloos.

“Iha duni prejuizu ba estadu ka la’e?, iha duni abuzu de poder ka la’e?, iha desizaun sira ne'e benefísia ba povu ka la’e?. Entaun, buat sira ne'e tenke liuhusi investigasaun ida que loloos, para ita bele deskonre verdade liuhusi nia prova, nomós ninia fatu sira, ita konstitui materia direitu sira hodi bele tulun ita-nia prokuradór sira atu halo, promove akuzasaun”, esplika nia.

Bainhira kazu kona-ba Ró tama ona ba kompeténsia KAK nian, sira sei halo prosesu investigasaun, maibé tanba serbisu ida ne'e sei iha interligadu ho autoridade judisiáriu sira hanesan Ministériu Públiku no Tribunál Kamára Kontas nia kompeténsia, iha ne'ebé kada tinan halo auditória ba despeza orsamentu jerál estadu nian iha programa governu nian.

“Entaun, sei halo auditória ba ne'ebá. Bainhira auditória ne'e iha, atu labele iha over laping iha ita-nia prosesu sira, entaun ita tenke iha pasiénsia oitoan atu haree sasán sira ne'e hotu”, afirma nia.

Entretantu, iha loron segunda (02/08) semana ne'e, hafoin sorumutuk ho Primeiru Ministru (PM), Taur Matan Ruak, ba jornalista sira, Prezidente RAEOA, Arsénio Paixão Bano informa, razaun sira seidauk halo ezekusaun ba orsamentu millaun US$14 ba Ró Haksolok tanba, progresu negosiasaun ba ró ne'e, seidauk la'o di'ak.

“Osan US$14 milões ne'e seidauk ezekuta, ita só selu kuandu progresu ne'e la'o, tanba ne'e mak ha'u dehan, progresu ne'e la'o di'ak, e ita-boot sira atu hatene progresu detalla la'o ho di'ak, ita foin mak hasai osan oitoan atu halo hotu negosiasaun ne'e”, dehan Bano. (*)