Deklarasaun ne'e, fó sai durante halo diskursu iha serimónia tomada de posse ba estrutura emposadu sira KAK nian iha periudu datoluk ho mandatu tinan tolu husi 2021 to'o 2023.
“Antes determina, ha'u hakarak fó ha'u-nia parabéns ba emposadu sira ho família, ba imi-nia dedikasaun tomak. Ida de'it mak ha'u hakarak salienta iha ne'e, ohin (05/08) imi tomada de posse, aban laloos, husu ba ita-boot sira-nia konsiénsia atu sees aan, lalika iha presaun husi leten. Sé ita-boot sira laiha kbi'it, iha poder administrativu ita-boot sira-nian, iha poder hierarkia ita-boot sira-nian, iha poder dixiplinar ita-boot sira-nian, iha poder polísial ita-boot sira-nian”, dehan Komisáriu Sergio Hornai, iha edifísiu, Farol, kinta (05/08).
Nune’e husu ba estrutura emposadu sira ne'ebé simu ona tomada posse, tenke serbisu hamutuk ho adjuntu sira no estrutura tomak atinje meta ne'ebé governu depozita hela ba KAK atu hala'o.
“Sé ita-boot sira laiha, ita-boot sira la'o sai ba. Bele sai, ema seluk iha liur barak loos. Tanba ida ne'e ha'u hakarak fó hatete momós ba ita-boot sira, e ha'u hakarak depozita ka fó votu de konfiansa ba ita-boot sira, mai hamutuk ho ha'u ho ha'u-nia adjuntu sira na'in-tolu, para ita fó susesu ba planu boot ne'ebé mak governu ka estadu depozita hela ba Komisaun Anti Korrupsaun”, hatete nia.
Ministru Prezidénsia Konsellu Ministru (MPKM), Fidelis Leite Magalhăes hatete, kna'ar ne'ebé simu iha vertente lahanesan tanba balu haree ba serbisu sira oinsá hasa'e kapasidade institusional, no balu foka ba asuntu sira iha liur ligadu ba kna'ar prevensaun no investigasaun sira ba atu korrupsaun ninian.
“Entaun, ho ida ne'e, lori governu nia naran, ita hatene katak, primeiru ita-boot sira merese parabéns, tanba iha mudansas institusional ne'ebé barak, hafoin ita hari’i KAK iha besik dékada ida liuba. Maibé, para luta kontra korrupsaun ne'ebé mak susesu iha ita-nia rai, presiza ita-boot sira, kuadru sira ne'ebé profisionál liu, ne’ebé treinadu, ekiparadu, e ne'ebé mós iha kbi'it tomak konforme lei, para bele halo imi-nia serbisu”, dehan nia.
Tanba ne'e, parte governu komprometidu atu kontinua investe no hadi'a rekuru umanu iha kuadru administrasaun públika nian ne'ebé mós relevante ba estrutura emposadu sira, no aumezmu tempu garante kontinuasaun ba apoiu polítiku ba esforsu luta nasionál kontra korrupsaun.
“Ho ida ne'e mak ami-nia prezensa iha ne'e mós atu expresa dala ida tan, ami-nia haksolok ba koolaborasaun ne'ebé mak durante ne'e señor komisáriu hato'o, fiar mós dehan katak durante Oitavo Governu ida ne'e, ita mós rejísta mudansa pozitivu balu”, dehan nia.
Rosário Salsinha de Araújo, ne'ebé foin simu posse sai Diretór Jerál ba Serbisu Investigasaun no Prevensaun, hato’o agradese ba Komisáriu KAK, tanba bele fó ona konfiansa ba sira hodi serbisu hamutuk durante mandatu tinan tolu iha luta ba hamenus korrupsaun.
“Agradese wa'in ba onra no konfiansa tomak ne'ebé señor komisáriu depozota ba kargu diresaun Xefia sira, hodi simu responsábilidade ida ne'e atu kontinua lidera hamutuk durantu komisáriu nian", afirma nia. (*)
