Tuir xefe suku Batugade Januário Guterres katak, matebian Merita Florensa Funan mate tanba hetan oho husi laen rasik ne’ebé lori katana ta’a no tudik sona mate iha fatin.

“Durante ne’e matebian ho nia laen problema hela de’it no nia laen agora prosesu iha hela Ministériu Públiku atu ba tribunál. Entaun tempu barak mak sira na’in rua la hela hamutuk ona, matebian ne’e nia laen hela iha Leohitu no matebian ne’e mak hela iha ne’e. Depois durante ne’e sira la hirus malu nia laen mai mós ko’alia di’ak de’it, nunka hasai liafuan ameasa,” dehan Januario ba jornalista sira iha Batugade, Kinta (4/3).

Nia hatutan, parese matebian ne’e nia laen mai subar iha uma laran, entaun iha dader kuandu matebian ba fó han tiha animal mai fali halo servisu iha uma, depois loke odamatan mak nia laen duni no oho iha fatin.

“Matebian nia laen parese mai horkalan hodi subar hela iha sira-nia uma, ohin dadersan matebian hader mai atu ba fó han sira nia animal, depois de ida ne’e nia dasa foer iha uma oin, kuandu dasa hotu, matebian ne'e loke odamatan tama ba mak nia laen kaer nia hodi istori malu, matebian nia laen atu ta’a iha uma laran la konsege, entaun matebian halai, nia laen duni tuir kuaze metru 20 mak nia laen toman no sona husi kotuk hodi matebian ne’e monu, depois matebian hader hali fali kuaze metru 10 mak nia duni tuir ta’a tan hodi matebian mate iha fatin,” autoriedade ne’e konta istória ba jornalista sira.

Autoriedade lokál ne’e haktuir kronolójia katak, hafoin kazu ne’e akontese tiha, susfeitu la halai, tanba nia mós kanek entaun monu hotu iha fatin ne’ebé matebian latan ba.

“Suspeitu ne’e mós kanek kiik oan iha nia hirus matan ne’e, lahatene nia ferik oan mak sona ka nia mak fila sona aan rasik ne’e ita lahatene, entaun nia mós monu no latan an hotu iha nia ferik-oan nia sorin. Entaun ami hanoin katak nia mós mate hotu, maibé liu minutu 15 hanesan ne’e nia dada iis no hakilar hodi ami liga ba seguransa sivíl, administradór no Komadante munisípiu tuun hotu iha ne’e, hodi foti dadus no sira husi investigasaun Munisípiu Bobonaru mai foti dadus no husu ba familia sira hatán atu lori ba hala’o autopsia, depois mak lori mai halot tuir kultura ne’ebe iha,” nia eplika.

Tuir fontes hanesan hateten antes ne'e suspeitu komete kazu ruma ne'ebe iha hela Ministériu Públiku, tanba deskonfia halo violasaun sexuál.

“Prosesu iha hela MP katak, suspeitu halo violasaun sexuál ba nia oan rasik, iha tempu ne’ebá matebian ne’e mai hato’o keixa ba ha’u rasik hanesan autoridade lokál, depois ha’u ba investiga no iha ne’e kedas ha’u liga ba eskuadra Batugade hodi foti kedas suspeitu AS ba Maliana hodi detein durante oras 72, depois lori nia informasaun ba MP depois fó nia atu hein prosesu no iha semana kotuk notifikasaun husi tribunál mai haruka nia ba asina nia karta atu prosesu ho ida ne’e mak agora mosu fali ida ne’e,” nia salienta.(*)