Tanba, komunidade hamutuk uma kain 11, nudar na'in ba rai, to'o agora ladauk satisfaz ho desizaun Governu nian.

Relasiona ho preokupasaun ne'e, xefe familia hamutuk 11, akompaña husi Organizasaun Rede ba Rai (RBR), desidi hakat ba Parlamentu Nasionál hodi hato'o keixa ba Komisaun A.

Prezidente Komisaun A, Deputadu Joaquim dos Santos katak, komisaun simu keixa ida husi Organizasaun Rede ba Rai (RBR) kona-ba desizaun governu hasai komunidade hamutuk uma kain 11 husi sira-nia hela fatin iha aldeia 01, suku Kaikoli.

"Ohin, komisaun A simu bainaka, husi organizasaun Rede ba Rai, sira lori sidadaun gurupu ida ninia interese ida, sira aprezenta ba komisaun A, depois rona tiha lamentasaun hirak ne'e, ami mós hanoin hela atu rona tán Ministeriu Justisa iha tempu oin mai, molok komisaum halo paresér ba parlamentu," dehan nia iha Parlamentu Nasionál, kuarta (24/2).

Nia konsidera, problema disputa rai iha Kaikoli ne'e akontese kleur ona, governu liuhusi Ministériu Justisa halo ona enkontru no diálogu ho komunidade sira.

Tanba ne'e, komunidade sira desidi husu tulun mós ba Parlamentu Nasionál atu haree, tanba sira la kontra desizaun polítika atu halo dezenvolvimentu, eh sira rasik mós apoia polítikaatu halo dezenvolvimentu ba rai ne'e maibé presiza tuir lei haruka.

"Tanba, sira husu parlamentu atu konsidera, para governu atu implementa lei karik, tenke haree mós ninia efeitu negativu sira-ne'ebé bele afeta ba sidadaun sira-nia diretu," dehan nia.

Nia argumenta, Konstituisaun KRDTL artigu 54 númeru 3 garante ko'alia kona-ba tnke iha justa indemnizasaun.

"Ne'e katak tenke selu indemnizasaun ba sidadaun ne'ebé de'it, karik bainhira sira hetan problema ida-ne'e nu'udar konsekuénsia husi desizaun estadu," dehan nia. (*)